KALESHWARAM | కాంగ్రెస్ ఉదాసీనతతోనే కరవు ముప్పు: కన్నెపల్లి పంపుల నుంచి నీటిని వెంటనే ఎత్తిపోయాలి: కేటీఆర్ డిమాండ్

రాష్ట్రంలో పొంచి ఉన్న కరవు ముప్పు నుంచి తెలంగాణను కాపాడటానికి కాంగ్రెస్ ప్రభుత్వం వెంటనే కన్నెపల్లి పంప్ హౌస్ను పునరుద్ధరించి, గోదావరి జలాలను ఎత్తిపోయాలని బీఆర్ఎస్ వర్కింగ్ ప్రెసిడెంట్ కె. తారకరామారావు (కేటీఆర్) శనివారం డిమాండ్ చేశారు. ఎల్ నినో ప్రభావం, లోటు వర్షపాతం, ప్రభుత్వ నిష్క్రియాపరత్వంతో రాష్ట్రం తీవ్ర నీటి సంక్షోభాన్ని ఎదుర్కొనే ప్రమాదం ఉందని కేటీఆర్ హెచ్చరించారు. కన్నెపల్లి పంప్ హౌస్ను పరిశీలించిన తరువాత మీడియాతో మాట్లాడిన కేటీఆర్, తెలంగాణలోని 33 జిల్లాలకు గాను 26 జిల్లాలు ఇప్పటికే కరవు పరిస్థితులను ఎదుర్కొంటున్నాయన్నారు. కాంగ్రెస్ ప్రభుత్వం కాళేశ్వరం మౌలిక సదుపాయాలను సరిగ్గా వినియోగించుకోవడంలో విఫలం కావడంతో లక్షల క్యూసెక్కుల గోదావరి జలాలు వృథాగా సముద్రంలో కలుస్తున్నాయని మండిపడ్డారు. రైతుల పట్ల కాంగ్రెస్ ప్రభుత్వానికి పూర్తి నిర్లక్ష్యం ఎల్ నినో ప్రభావం, సాధారణం కంటే తక్కువ వర్షపాతం నమోదవుతుందంటూ వాతావరణ నిపుణులు పదే పదే హెచ్చరించినప్పటికీ, కాంగ్రెస్ ప్రభుత్వం రైతుల పట్ల పూర్తి ఉదాసీనతను ప్రదర్శిస్తోందని కేటీఆర్ ఆరోపించారు. "కరవును ఎదుర్కొనేందుకు ముందస్తుగా సిద్ధమై, వ్యవసాయాన్ని కాపాడాల్సింది పోయి.. ప్రభుత్వం విలువైన నీటిని వృథాగా వదిలేస్తూ రైతులను గోస పెడుతోంది" అని ఆయన ఆగ్రహం వ్యక్తం చేశారు. తెలంగాణవ్యాప్తంగా సాగు, తాగునీటి అవసరాలను తీర్చడానికి ప్రభుత్వం తక్షణమే కన్నెపల్లి పంపులను పునఃప్రారంభించి, జలాశయాలను నింపాలని కేటీఆర్ డిమాండ్ చేశారు. దిగుబడి పెరిగితే పంటను సేకరించడం, ఎరువుల సరఫరా చేయడం, రైతులకు బోనస్ చెల్లించడం వంటి ఆర్థిక బాధ్యతలకు భయపడే కాంగ్రెస్ ప్రభుత్వం ఉద్దేశపూర్వకంగానే నీటిని నిలిపివేస్తోందని ఆరోపించారు. రాజకీయాలు పక్కనబెట్టి పంపులు ఆన్ చేయాలి కాళేశ్వరం ఎత్తిపోతల పథకంపై కాంగ్రెస్ ప్రభుత్వం చేస్తున్న అవినీతి ఆరోపణలను కేటీఆర్ తోసిపుచ్చారు. ఆలస్యం చేయకుండా ప్రాజెక్టుకు అవసరమైన మరమ్మతులను వెంటనే పూర్తి చేయాలని డిమాండ్ చేశారు. మాజీ ముఖ్యమంత్రి కేసీఆర్ నాయకత్వంలో నిర్మితమైన ఈ ప్రాజెక్టును సరిగ్గా నిర్వహిస్తే, ఇప్పటికీ నీటిని సరఫరా చేసే పూర్తి సామర్థ్యం దానికి ఉందని స్పష్టం చేశారు. నీటి కోసం తెలంగాణ చేసిన సుదీర్ఘ పోరాటాన్ని ఈ సందర్భంగా గుర్తుచేసిన కేటీఆర్, భూగర్భ జలాల పెంపు, సాగు విస్తీర్ణం పెరగడానికి, వ్యవసాయ ఉత్పాదకత సాధించడానికి, తాగునీరు అందించడంలో కాళేశ్వరందే ప్రధానపాత్ర అన్నారు. ప్రభుత్వం సకాలంలో స్పందించకపోతే హైదరాబాద్ నగరానికి కూడా తాగునీటి కొరత వస్తుందని హెచ్చరించిన ఆయన.. నీటి సరఫరాపై రాజకీయం చేయడం ఆపి, వెంటనే కన్నెపల్లి పంప్ హౌస్ను అందుబాటులోకి తీసుకురావాలన్నారు. బీఆర్ఎస్ పర్యటనకు అడ్డంకులు.. హైదరాబాద్ నుంచి కన్నెపల్లి వస్తున్న బీఆర్ఎస్ ప్రతినిధి బృందాన్ని పోలీసులు పదే పదే అడ్డుకోవడాన్ని కేటీఆర్ తీవ్రంగా ఖండించారు. పలుచోట్ల బారికేడ్లు, ఆంక్షలు విధించడంతో నాలుగు గంటల్లో పూర్తి కావాల్సిన తమ ప్రయాణం దాదాపు ఏడు గంటల పాటు సాగిందని మండిపడ్డారు. 50 వేల మందితో కన్నెపల్లి పంప్ హౌస్ ముట్టడికి పిలుపు కాంగ్రెస్ ప్రభుత్వం కన్నెపల్లి పంపుల నుంచి నీటిని ఎత్తిపోయడం తక్షణమే ప్రారంభించకపోతే బీఆర్ఎస్ తన ఉద్యమాన్ని ఉధృతం చేస్తుందని కేటీఆర్ హెచ్చరించారు. తెలంగాణ రైతుల ప్రయోజనాలను విస్మరించి, అందుబాటులో ఉన్న గోదావరి జలాలను వినియోగించుకోకపోతే.. 50 వేల నుంచి 60 వేల మంది ప్రజలతో కన్నెపల్లి పంప్ హౌస్ను ముట్టడిస్తామని హెచ్చరించారు. "వెంటనే బాహుబలి పంపులను ఆన్ చేసి రైతులకు నీరివ్వండి. ప్రభుత్వం స్పందించకపోతే.. మేమే కన్నెపల్లికి మార్చ్ నిర్వహించి, పంప్ హౌస్ను ముట్టడించి, పంపులను ఆన్ చేయిస్తాం" అని కేటీఆర్ స్పష్టం చేశారు.