Nizamabad Crime: ప్రియుడి కోసం భర్త నరాల్లోకి హార్పిక్ ఎక్కించి చంపేసిన భార్య

వివాహేతర సంబంధాలు ఎలాంటి దారుణాలకైనా దారితీస్తాయనడానికి నిజామాబాద్ జిల్లాలో జరిగిన ఒక షాకింగ్ ఘటనే నిదర్శనం. తన గుట్టు రట్టయిందనే కోపంతో, ప్రియుడితో కలిసి జీవించాలనే దురాశతో ఒక భార్య.. కట్టుకున్న భర్తను అత్యంత దారుణంగా కడతేర్చింది. మొదట ప్రమాదంగా నమ్మించాలని చూసినా, పోస్ట్మార్టం నివేదిక, పోలీసుల డేగ కన్నుతో అసలు పాపం బయటపడింది. గల్ఫ్ నుంచి రాక.. వివాహేతర బంధం రచ్చ పోలీసుల కథనం ప్రకారం.. నిజామాబాద్ జిల్లా మోపాల్ మండలం న్యాలకల్ గ్రామానికి చెందిన ప్రశాంత్ అనే వ్యక్తి కుటుంబ పోషణ నిమిత్తం గల్ఫ్ దేశానికి వెళ్లాడు. భర్త ఊర్లో లేని సమయంలో అతడి భార్య సంధ్య.. అదే గ్రామానికి చెందిన అనిల్ అనే వ్యక్తితో వివాహేతర సంబంధం పెట్టుకుంది. ఇటీవల ప్రశాంత్ గల్ఫ్ నుంచి తిరిగి వచ్చాడు. ఈ క్రమంలోనే భార్య ప్రవర్తనపై అనుమానం రావడం, ఆమె గుట్టు కాస్తా బయటపడటంతో దంపతుల మధ్య గత కొన్ని రోజులుగా తీవ్రస్థాయిలో గొడవలు జరుగుతున్నాయి. పైనుంచి తోసేసి.. ఆపై ఆసుపత్రిలోనే స్కెచ్ భర్త బతికుంటే తాము కలిసి ఉండలేమని భావించిన సంధ్య, అదే గ్రామానికి చెందిన వెంకట సాయి అలియాస్ బంటితో కలిసి ప్రశాంత్ను వదిలించుకోవాలని పథకం వేసింది. ప్లాన్ ప్రకారం జూన్ 30న భర్తకు ఫుల్లుగా మద్యం తాగించి మత్తులోకి జారుకున్నాక ఇద్దరు కలిసి ఇంటి పైనుంచి కిందికి తోసేశారు. కింద పడటంతో ప్రశాంత్కు తీవ్ర గాయాలయ్యాయి. కుటుంబ సభ్యులు వెంటనే గమనించి అతడిని నిజామాబాద్లోని ఒక ప్రైవేట్ ఆసుపత్రికి తరలించారు. నరాల్లోకి టాయిలెట్ క్లీనర్ ఇంజెక్ట్ చేసి.. హాస్పిటల్లో చికిత్స పొందుతున్నప్పటికీ ప్రశాంత్ బతికే అవకాశం ఉందని గ్రహించిన సంధ్య, బంటిలు మరో ఘోరానికి ఒడిగట్టారు. ఆసుపత్రిలో ఎవరికీ అనుమానం రాకుండా సిరంజ్ (Syringe) సహాయంతో ప్రశాంత్ నరాల్లోకి నేరుగా టాయిలెట్ క్లీనర్ (హార్పిక్)ను ఇంజెక్ట్ చేశారు. కెమికల్స్ నేరుగా రక్తంలో కలవడంతో ప్రశాంత్ పరిస్థితి విషమించి ప్రాణాలు కోల్పోయాడు. మద్యం మత్తులో ఇంటి పైనుంచి పడిపోవడంతోనే ప్రశాంత్ చనిపోయాడని సంధ్య అందరినీ నమ్మించే ప్రయత్నం చేసింది. పోస్ట్మార్టంలో తేలిన అసలు నిజం.. నిందితులు అదుపులోకి ప్రశాంత్ మృతిపై అనుమానం రావడంతో పోలీసులు మృతదేహాన్ని పోస్ట్మార్టం కు పంపించారు. రిపోర్టులో ప్రశాంత్ శరీరంలో, నరాల్లో కెమికల్స్ (టాయిలెట్ క్లీనర్) ఉన్నట్లు శాస్త్రీయ ఆధారాలు లభించాయి. దీంతో పోలీసులు భార్య సంధ్యను తమదైన శైలిలో విచారించగా, బంటితో కలిసి చేసిన ఈ కిరాతక హత్యను ఆమె ఒప్పుకుంది. ఇద్దరినీ అదుపులోకి తీసుకున్న పోలీసులు రిమాండ్ కు తరలించారు.