Revanth Reddy vs Kishan Reddy: సామాన్యుడికి ఒక న్యాయం..ఒవైసీకి ఒక న్యాయమా? కిషన్ రెడ్డి ప్రశ్నల వర్షం

మజ్లిస్ పార్టీ అంటే రేవంత్ రెడ్డి సర్కారుకు భయమా,ప్రేమా..? లేక రెండూ ఉన్నాయా అని కేంద్ర బొగ్గు, గనుల శాఖ మంత్రి కిషన్ రెడ్డి ప్రశ్నించారు. భూములు, రియల్ ఎస్టేట్ లో కమీషన్ల కోసం ఆరాటపడుతున్న రేవంత్ సర్కార్, సామాన్య ప్రజల జీవితాలను బలిచేస్తూ..ఓవైసీ బ్రదర్స్ ప్రయోజనాలను మాత్రం కాపాడుతోందని ఆరోపించారు. రేవంత్ సర్కార్ సాగిస్తున్న పక్షపాత పాలనకు హైడ్రానే ప్రత్యక్ష ఉదాహరణ అన్నారు. సామాన్య ప్రజల ఇళ్లు, చిన్న చిన్న నిర్మాణాల విషయంలో మెరుపు వేగంతో స్పందించి బుల్డోజర్లతో కూల్చివేతలు సాగిస్తున్న కాంగ్రెస్ సర్కార్..ఒవైసీ ఫ్యామిలీకి చెందిన ‘ఫాతిమా ఓవైసీ ఎడ్యుకేషనల్ క్యాంపస్’ విషయంలో మాత్రం మీనమేషాలు లెక్కిస్తోందని మండిపడ్డారు. సల్కం చెరువు ఫుల్ ట్యాంక్ లెవెల్ (FTL), బఫర్ జోన్ను మొత్తం ఆక్రమించి ఫాతిమా క్యాంపస్ నిర్మించారన్న ఆరోపణలపై తెలంగాణ హైకోర్టు ఇప్పటికే ఆగ్రహం వ్యక్తం చేసిన విషయాన్ని కిషన్ రెడ్డి గుర్తుచేశారు. ఈ కాలేజీ విషయంలో సర్కార్ అనుసరిస్తున్న వైఖరిపై హైకోర్టు ఆగ్రహం వ్యక్తం చేసినా పరిస్థితిలో మార్పు రాలేదన్నారు. హైడ్రా, విద్యాశాఖ శాఖలతో పాటు సంబంధిత శాఖల నుంచి కోర్టు అడిగిన వివరాలను ఇప్పటికీ ఇవ్వలేదని కిషన్ రెడ్డి తెలిపారు. సామాన్యుల ఇండ్ల విషయంలో చూపించే వేగాన్ని, ఈ కాలేజీ విషయంలో కాంగ్రెస్ ప్రభుత్వం ఎందుకు చూపించడం లేదని కిషన్ రెడ్డి ప్రశ్నించారు. యావత్ ముస్లిం సమాజానికి మజ్లిస్నే ఏకైక ప్రతినిధిగా కాంగ్రెస్ పార్టీ భావిస్తూ ఓటు బ్యాంకు రాజకీయాలు చేస్తోందని కిషన్ రెడ్డి విమర్శించారు. హైడ్రా కూల్చివేతలతో ఎంతోమంది పేద ముస్లింల ఇళ్లు కూలిపోయి, వాళ్ల బతుకులు రోడ్డున పడ్డప్పుడు మజ్లిస్ గానీ, కాంగ్రెస్ గానీ ఒక్క మాట కూడా మాట్లాడలేదన్నారు. అదే ఒవైసీ సోదరుల ఆస్తుల విషయానికి వచ్చేసరికి మాత్రం ఈ రెండు పార్టీలు ఒక్కటవుతున్నాయని మండిపడ్డారు. కాంగ్రెస్ ప్రభుత్వానికి ముస్లిం సమాజంపై ఎలాంటి ప్రేమ లేదని, కేవలం తమ రాజకీయ మిత్రుడైన ఒవైసీకి ఇబ్బంది కలగకూడదనే రేవంత్ సర్కారు తాత్సారం చేస్తోందన్నారు. భూములు, చెరువులు, ప్రభుత్వ ఆస్తులు అనేవి తెలంగాణ ప్రజల సొత్తే తప్ప, రాజకీయ అండదండలు ఉన్నవారి వ్యక్తిగత ఆస్తులు కావని స్పష్టం చేశారు.ఇకనైనా మతపరమైన, ఓటు బ్యాంకు రాజకీయాలు మానుకోవాలని రేవంత్ రెడ్డికి సూచించారు. ప్రజలందరికీ ‘ఒకే చట్టం, ఒకే న్యాయం’ అనే నియమాన్ని పాటించాలన్నారు కిషన్ రెడ్డి Fear of the MIM? Love for the MIM? Or both? In its lust for commissions from land and real estate deals, the Revanth Reddy Government is willing to sacrifice the livelihoods of ordinary citizens while going to any extent to protect the Majlis party. HYDRAA has become a symbol of… pic.twitter.com/mfxCEEdVG3 — G Kishan Reddy (@kishanreddybjp) July 5, 2026