South First Ground Report | తెలంగాణ స్కూల్ బ్రేక్‌ఫాస్ట్ స్కీమ్: బడిబాట పెరిగింది..కానీ ఈ లోపాలను..

తెలంగాణ ప్రభుత్వం ప్రభుత్వ పాఠశాలల్లో ప్రతిష్టాత్మకంగా చేపట్టిన 'స్కూల్ బ్రేక్ఫాస్ట్ అండ్ మిల్క్ స్కీమ్' క్షేత్రస్థాయిలో మంచి మార్పులను తీసుకువస్తోంది. విద్యార్థులు, తల్లిదండ్రుల నుంచి దీనికి సానకూల స్పందన లభిస్తున్నప్పటికీ.. నాణ్యత, నిర్వహణ పరంగా ఈ పథకం కొన్ని సవాళ్లను కూడా ఎదుర్కొంటోంది. ఈ విప్లవాత్మక పథకం సాధిస్తున్న విజయాలు, అధిగమించాల్సిన లోపాలపై 'సౌత్ ఫస్ట్' ప్రత్యేక విశ్లేషణ ఆకలి తీరింది.. హాజరు పెరిగింది ఉదయాన్నే వేడివేడి అల్పాహారం దొరుకుతుండటంతో విద్యార్థులు సమయానికి స్కూళ్లకు వస్తున్నారు. ఫలితంగా మార్నింగ్ అసెంబ్లీలో హాజరు శాతం గణనీయంగా పెరిగింది. సికింద్రాబాద్ మారేడ్ పల్లి ప్రైమరీ స్కూల్లో విద్యా సంవత్సరం ప్రారంభమైన మొదటి వారంలోనే రికార్డు స్థాయిలో 50 కొత్త అడ్మిషన్లు వచ్చాయి. కొందరు తల్లిదండ్రులు తమ పిల్లలను ప్రైవేట్ స్కూళ్ల నుండి ప్రభుత్వ స్కూళ్లకు మారుస్తున్నారు. రోజువారీ కూలీలు, పెయింటర్లు, డ్రైవర్లు, హాస్పిటల్స్ లో నర్సులుగా పనిచేసే తల్లులకు ఈ పథకం పెద్ద ఊరటనిచ్చింది. ఉదయాన్నే పిల్లల తిండి గురించి ఆలోచించే టెన్షన్ తగ్గిందని వారు సంతోషం వ్యక్తం చేస్తున్నారు. విద్యాశాఖ మంత్రి పొన్నం ప్రభాకర్ ప్రారంభించిన ఈ పథకంతో రాష్ట్రవ్యాప్తంగా ఉన్న దాదాపు 29 లక్షల మంది ప్రీ-ప్రైమరీ నుంచి ఇంటర్ సెకండియర్ విద్యార్థులు లబ్ధి పొందుతున్నారు. ఏడాదికి సుమారు రూ.720 కోట్ల బడ్జెట్ తో పైలట్ ప్రాజెక్టుగా హైదరాబాద్ జిల్లాలోని 45 స్కూల్స్ లో ప్రస్తుతం ఈ స్కీం అమలవుతోంది. క్షేత్రస్థాయి సవాళ్లు.. నాణ్యతా లోపాలు పథకానికి ఆదరణ లభిస్తున్నప్పటికీ, సరఫరాతో పాటు క్వాలిటీ విషయంలో విద్యార్థులు, ఉపాధ్యాయుల నుండి కొన్ని ఫిర్యాదులు వస్తున్నాయి మైదాతో చేసిన పూరీల నాణ్యత బాలేదని, పిల్లలు వాటిని తినకుండ డస్ట్బిన్లలో పారేస్తున్నారని కవాడిగూడ, మలక్పేట్ స్కూల్ టీచర్లు ఒప్పుకున్నారు. క్వాలిటీపై ఫిర్యాదులు రావడంతో ప్రతిపక్షాలు కూడా తీవ్రంగా విమర్శించాయి. మెనూ ప్రకారం వారంలో 3 రోజులు పాలు, 3 రోజులు రాగి మాల్ట్ ఇవ్వాలి. అయితే పైలెట్ ప్రాజెక్టు అమలవుతున్న ఏ పాఠశాలలో కూడా రాగి మాల్ట్ ఇవ్వడం లేదు. ఇంకొన్ని స్కూల్స్ లో ఇస్తున్న పాల నాణ్యత కూడా బాలేదని, మిల్క్ పౌడర్ టేస్ట్ వస్తోందని విద్యార్థులు చెబుతున్నారు. వైఎంసిఎ బాయ్స్ హైస్కూల్ విద్యార్థులు ఇడ్లీ, ఉప్మాలలో అప్పుడప్పుడు రాళ్లు వస్తున్నాయని ఫిర్యాదు చేశారు. హైస్కూల్ విద్యార్థులపై వివక్ష? ఒకే కాంప్లెక్స్లో ఉన్న హైస్కూళ్లు, ప్రభుత్వ జూనియర్ కాలేజీల మధ్య ఆహార సరఫరాలో వివక్ష చూపిస్తున్నారన్న ఆరోపణలు వినిపిస్తున్నాయి. మెనూ ప్రకారం అన్ని రకాల బ్రేక్ఫాస్ట్లతో పాటు రాగి మాల్ట్ కూడా జూనియర్ కాలేజీలకు సక్రమంగా అందుతోంది. కానీ, అదే క్యాంపస్ లో ఉన్న హైస్కూళ్లకు మాత్రం కేవలం ఇడ్లీ, ఉప్మా మాత్రమే ఇస్తూ.. రాగి మాల్ట్, పాలు సరిగ్గా ఇవ్వడం లేదని స్కూల్ సిబ్బంది ఆవేదన వ్యక్తం చేస్తున్నారు. ప్రభుత్వ నిర్ణయంపై రాజకీయ, ఉపాధ్యాయ సంఘాల విమర్శలు జూలై 2న జరిగిన క్యాబినెట్ సమావేశంలో ఈ బ్రేక్ఫాస్ట్, మిడ్డే మీల్స్ పథకాన్ని స్కూల్ టీచర్లు, స్టాఫ్ కు కూడా వర్తింపజేస్తూ ప్రభుత్వం నిర్ణయం తీసుకుంది. అయితే ఈ నిర్ణయంపై భిన్నాభిప్రాయాలు వ్యక్తమవుతున్నాయి అధికార కాంగ్రెస్ పార్టీ ప్రతినిధి, PRTU (ప్రోగ్రెసివ్ రికగ్నైజ్డ్ టీచర్స్ యూనియన్) వ్యవస్థాపక అధ్యక్షుడు హర్షవర్ధన్ రెడ్డి ఈ నిర్ణయాన్ని తప్పుపట్టారు. టీచర్ల భోజనం కోసం కేటాయించే అదనపు నిధులను కూడా విద్యార్థుల సంక్షేమానికే మళ్లించాలని, తద్వారా పిల్లలకు అందించే ఆహార నాణ్యతను మరింత పెంచవచ్చని హర్షవర్ధన్ రెడ్డి డిమాండ్ చేశారు. పేద పిల్లల ఆకలి తీర్చడమే ఈ పథకం మూల లక్ష్యంగా ఉండాలని స్పష్టం చేశారు. క్లాస్రూమ్ ఆకలిని దూరం చేస్తూ, ప్రభుత్వ బడి వైపు పిల్లలను నడిపించడంలో ఈ అల్పాహార పథకం మంచి ఫలితాలను ఇస్తోంది. అయితే, ఈ పైలట్ ప్రాజెక్ట్ను రాష్ట్రవ్యాప్తంగా విస్తరించే లోపు..మెనూలో చెప్పిన చిరుధాన్యాల (మిల్లెట్స్) వాడకాన్ని పెంచి, నాణ్యతా లోపాలను పూర్తిగా సరిదిద్దాల్సిన బాధ్యత ప్రభుత్వంపై ఉంది.