Kerala Priyadarshini Scheme: కేరళ ప్రైవేట్ బస్సు రంగాన్ని కుదిపేస్తోన్న ప్రియదర్శిని పథకం!

కేరళలో ప్రస్తుతం మీరు ఏదైనా ప్రైవేట్ బస్సు ఎక్కితే ఒక విచిత్రమైన దృశ్యం కనిపిస్తుంది. బస్సు కండక్టర్ మీ దగ్గరకు వచ్చి టికెట్తో పాటు మురుకులు, అచ్చప్పం, కుజలప్పం లాంటి స్నాక్స్ ప్యాకెట్లను కూడా కొంటారా అని బతిమాలుతుంటారు. వారు ఏదో పార్ట్ టైమ్ బిజినెస్ చేయాలనో, వ్యాపారస్తులు కావాలనో ఈ పని చేయడం లేదు. బస్సుకు డీజిల్ కొట్టించడానికి, రోజువారీ ఖర్చులను సంపాదించడానికి ప్రైవేట్ బస్సు కార్మికులు పడుతున్న ఆరాటం ఇది. కేరళ ప్రభుత్వం ప్రవేశపెట్టిన 'ప్రియదర్శిని' పథకం ప్రైవేట్ బస్సు రంగాన్ని ఎంతటి ఆర్థిక సంక్షోభంలోకి నెట్టిందో చెప్పడానికి ఈ మురుకుల అమ్మకాలే ప్రత్యక్ష నిదర్శనం. కుటుంబాలకు కుటుంబాలే కేఎస్ఆర్టీసీ వైపు.. యూడీఎఫ్ (UDF) ప్రభుత్వం తన 'ఇందిర గ్యారెంటీలలో' భాగంగా మహిళలు, ట్రాన్స్జెండర్లకు ఆర్డినరీ కేఎస్ఆర్టీసీ (KSRTC) బస్సుల్లో ఉచిత ప్రయాణం కల్పిస్తూ జూన్ 15న ఈ 'ప్రియదర్శిని' పథకాన్ని ప్రారంభించింది. దీంతో దాదాపు 5 లక్షల మంది అదనపు మహిళా ప్రయాణికులు కేఎస్ఆర్టీసీ బస్సులకు షిఫ్ట్ అయ్యారు. సాధారణంగా తక్కువ దూరం ఉన్న టౌన్ రూట్లలో ప్రైవేట్ బస్సులకు మహిళలే ప్రధాన ఆదాయ వనరు. అయితే ప్రస్తుతం వారంతా ఉచిత ప్రయాణం వైపు మొగ్గు చూపడంతో ప్రైవేట్ బస్సులు ఖాళీగా దర్శనమిస్తున్నాయి. "ఇంట్లో మహిళకు ఉచితం అనగానే భర్త, మిగతా కుటుంబ సభ్యులు కూడా కేఎస్ఆర్టీసీ బస్సే ఎక్కుతున్నారు. ఫలితంగా మేము ఒక్క ప్రయాణికుడిని కాదు, ఒకేసారి ఒక ఫ్యామిలీని కోల్పోతున్నాం" అని ప్రైవేట్ బస్సు ఓనర్స్ అసోసియేషన్ ప్రతినిధి ఆవేదన వ్యక్తం చేశారు. వేలాది రూపాయల నష్టాలు.. నిలిచిపోతున్న సర్వీసులు ఈ పథకంతో పతనంతిట్ట, ఎర్నాకులం, కాసరగోడ్ వంటి జిల్లాల్లో ప్రైవేట్ బస్సుల రోజువారీ కలెక్షన్ సగానికి పడిపోయింది. ఒక్కో బస్సుకు రోజుకు 2,000 రూపాయల నుంచి 5,000 రూపాయల వరకు నష్టం వస్తోంది. దీంతో డీజిల్ ఖర్చులు కూడా రాక కేరళ వ్యాప్తంగా దాదాపు 150 మంది ప్రైవేట్ బస్సుల యజమానులు తమ సర్వీసులను తాత్కాలికంగా నిలిపివేయడానికి అనుమతి కోరుతూ ప్రభుత్వానికి 'G ఫార్మ్స్' ఇచ్చారు. ఇప్పటికే ఎర్నాకులంలో 30 బస్సులు ఆగిపోయాయి. ప్రభుత్వం త్రైమాసిక మోటార్ వాహన పన్నులో 50 శాతం రాయితీ ఇచ్చినప్పటికీ..అది రోజుకు కేవలం 130 రూపాయలు మాత్రమే ఆదా చేస్తుందని, రోజుకు వేలల్లో నష్టం వస్తుంటే ఈ చిన్న రాయితీ దేనికి సరిపోతుందని యజమానులు ప్రశ్నిస్తున్నారు. రాష్ట్రవ్యాప్త సమ్మెకు సై.. ప్రభుత్వం అలర్ట్ ఆటో, టాక్సీ యూనియన్స్ తో పాటు టూరిస్ట్ వాహనాల అసోసియేషన్ తో కలిసి ప్రైవేట్ బస్ ఆపరేటర్లు జూలై 6న రాష్ట్రవ్యాప్త సమ్మె కు పిలుపునిచ్చారు. అలాగే జూలై 20 నుండి 25 వరకు సెక్రటేరియట్ ముందు బస్సు ఆపరేటర్ల ఫెడరేషన్ ఆరు రోజుల రిలే దీక్షలను ప్రకటించింది. ప్రైవేట్ బస్సుల నుంచి వస్తున్న తీవ్ర నిరసనలపై రవాణా శాఖ మంత్రి సీపీ జాన్ స్పందించారు. కేఎస్ఆర్టీసీ, ప్రైవేట్ బస్సులు సమాంతరంగా నడిచే రూట్లను గుర్తించడానికి 'రూట్ మ్యాపింగ్' ప్రక్రియను ప్రారంభించామని, సీఎం వీడీ సతీశన్ అనుమతితో దీనిపై అధ్యయనానికి ఒక నిపుణుల కమిటీని వేస్తున్నామని ప్రకటించారు. జూలై 13న ప్రైవేట్ బస్సు యజమానులతో ప్రత్యక్ష చర్చలు జరపనున్నట్లు మంత్రి తెలిపారు. ప్రజా రవాణాలో కీలక పాత్ర పోషిస్తున్న ప్రైవేట్ బస్సు రంగాన్ని కాపాడటానికి ప్రభుత్వం ఎలాంటి ప్రత్యామ్నాయాలు చూపుతుందో చూడాలి.