Prashna Raavan Arrest: యూట్యూబర్ ప్రశ్న రావణ్‌ పై UAPA చట్టం.14 రోజుల రిమాండ్..

ఆంధ్రప్రదేశ్ పోలీసులు తాము అనుకున్నది సాధించారు. ప్రముఖ రాజకీయ విశ్లేషకుడు, యూట్యూబర్ 'ప్రశ్న రావణ్' (అసలు పేరు బి. జోసెఫ్) ను జైలుకు పంపించడంలో ఏపీ పోలీసులు విజయం సాధించారు. ఆదివారం (జూలై 5) ఆయనను గన్నవరం అడిషనల్ జూనియర్ సివిల్ కోర్టు ముందు హాజరుపరచగా, న్యాయమూర్తి ప్రశ్న రావణ్కు 14 రోజుల జుడీషియల్ రిమాండ్ విధించారు. భారతీయ న్యాయ సంహిత (BNS)లోని తీవ్రమైన సెక్షన్లతో పాటు కఠినమైన చట్టవిరుద్ధ కార్యకలాపాల నిరోధక చట్టం (UAPA) కింద నమోదైన ఐదో కేసులో ఆయన లాయర్ బెయిల్ సాధించలేకపోయారు. డిప్యూటీ సీఎం పవన్ కళ్యాణ్, ఆయన కుటుంబ సభ్యులను టార్గెట్ చేస్తూ వీడియోలు చేశారన్న ఆరోపణలపై ఆంధ్రప్రదేశ్ లోని వివిధ పోలీస్ స్టేషన్లలో నమోదైన నాలుగు కేసుల్లో ఈ యూట్యూబర్ ఇప్పటికే బెయిల్ పొందారు. అయితే శనివారం రాత్రి గన్నవరం పోలీసులు ఆయనను ఐదోసారి అరెస్ట్ చేశారు. కృష్ణా జిల్లా గన్నవరం పోలీస్ స్టేషన్లో నమోదైన ఈ ఎఫ్ఐఆర్లో (FIR) బీఎన్ఎస్ సెక్షన్లు 147, 148, 152, 192, 197(1)(d), 353(1)(b) లతో పాటు UAPA చట్టంలోని సెక్షన్ 13, 39లను చేర్చారు. ‘ప్రశ్న’ రావణ్పై ఉన్న ఆరోపణలు ఇవే: నేరపూరిత కుట్ర, ప్రజా శాంతికి భంగం కలిగించడం, భారతదేశ సార్వభౌమత్వానికి, అఖండతకు ముప్పు వాటిల్లేలా ప్రవర్తించడం, చట్టవిరుద్ధమైన కార్యకలాపాలతో పాటు తీవ్రవాద సంస్థలకు మద్దతు ఇవ్వడం వంటి తీవ్రమైన ఆరోపణలను రావణ్ పై మోపారు. వీటన్నింటిలో కల్లా అత్యంత తీవ్రమైనది BNS లోని సెక్షన్ 147. ఇది భారత ప్రభుత్వానికి వ్యతిరేకంగా యుద్ధం ప్రకటించడం, యుద్ధానికి ప్రయత్నించడం లేదా ప్రోత్సహించడం వంటి నేరాలను కవర్ చేస్తుంది. ఈ నేరానికి మరణశిక్ష లేదా జీవిత ఖైదుతో పాటు జరిమానా కూడా విధించే అవకాశం ఉంది. ‘ప్రశ్న’ రావణ్ తరఫున వాదించిన లాయర్ జడ శ్రవణ్ కుమార్ ఇది ముమ్మాటికీ కక్షపూరిత చర్య అని ఆరోపించారు. "ఎఫ్ఐఆర్లో ఉన్న అంశాలకు, అసలు క్షేత్రస్థాయిలో జరిగిన వాస్తవాలకు ఎలాంటి సంబంధం లేదని మాకు స్పష్టంగా తెలుస్తోంది" అని ఆయన తెలిపారు. ప్రభుత్వ అనుకూల వర్గాల ఒత్తిడితోనే UAPA? మొదటి నాలుగు కేసుల్లో ప్రశ్న రావణ్ను జుడీషియల్ రిమాండ్కు పంపడంలో పోలీసులు విఫలం కావడంతో, ప్రభుత్వ అనుకూల వర్గాల నుంచి తీవ్ర విమర్శలు వచ్చాయని..ఆ ఒత్తిడి తోనే పోలీసులు ఈసారి UAPA చట్టాన్ని ప్రయోగించారనే ఆరోపణలు వినిపిస్తున్నాయి. దీంతో గన్నవరం అడిషనల్ జూనియర్ సివిల్ కోర్టు మేజిస్ట్రేట్ ప్రాసిక్యూషన్ డిమాండ్ను అంగీకరించి రిమాండ్ విధించారు. దీంతో రావణ్ను నెల్లూరు జైలుకు తరలించారు. ప్రశ్న రావణ్ తరఫున కేవలం ఒక్క లాయర్ మాత్రమే వాదించగా, ప్రాసిక్యూషన్ (ప్రభుత్వం) తరఫున ఏకంగా 20 మంది న్యాయవాదులు కోర్టుకు హాజరుకావడంతో ఈ కేసు విషయంలో ప్రభుత్వం ఎంతో సీరియస్ గా ఉందని అర్థం అవుతోంది.