RAAVAN ARREST | గొంతు లేని వారి గొంతుకగా నిలిచారు: యూట్యూబర్ ప్రశ్న రావణ్ అరెస్ట్‌పై భార్య అనూష ఆవేదన

యూట్యూబర్, పొలిటికల్ కామెంటేటర్ "ప్రశ్న" రావణ్ అరెస్ట్ వ్యవహారం ఆంధ్రప్రదేశ్లో తీవ్ర రాజకీయ దుమారం రేపుతోంది. ఐదు రోజుల్లో ఐదోసారి ఆయనను పోలీసులు అరెస్ట్ చేసి ఉపా(UAPA), బీఎన్ఎస్ (BNS) చట్టాల కింద కేసులు నమోదు చేయడంతో కృష్ణా జిల్లా గన్నవరం కోర్టు రావణ్కు 14 రోజుల జుడీషియల్ రిమాండ్ విధించింది.దీంతో ఆయనను నెల్లూరు సెంట్రల్ జైలుకు తరలించిన విషయం తెలిసిందే. ఈ నేపథ్యంలో జూలై 5న రావణ్ భార్య అనూష ఒక ప్రకటన విడుదల చేస్తూ సోషల్ మీడియాలో రావణ్ పై దుష్ప్రచారాన్ని ఖండించారు. "మాకు ఏ పార్టీతోనూ సంబంధం లేదు. సమాజంలో గొంతు లేని ప్రజల పక్షాన నిలబడి ప్రశ్నించడమే రావణ్ సిద్ధాంతం. అదే ఆయన పార్టీ, అదే ఆయన గ్రూప్" అని ఆమె ఒక ప్రకటనలో తెలిపారు. కొందరు రావణ్ను దళిత క్రైస్తవుడిగా భావిస్తున్నారని, కానీ రావణ్ 'కమ్మ' సామాజిక వర్గానికి చెందినవారని ఆమె స్పష్టం చేశారు. ఇంతేకాదు రావణ్ అనేది ఆయన అధికారిక పేరు అని చెప్పారు. కులమతాల పేరుతో చేసే విభజన, ద్వేష రాజకీయాలను తమ కుటుంబం వ్యతిరేకిస్తుందన్న అనూష, ప్రజాస్వామ్యాన్ని నమ్మే వ్యక్తిగా ప్రభుత్వాన్ని రావణ్ గట్టిగా ప్రశ్నించారని, దానికి సమాధానం చెప్పాల్సింది పోయి ఇలా చట్టాన్ని జోక్ గా మార్చడం సరికాదన్నారు. పోలీసుల వేధింపులపై తీవ్ర ఆగ్రహం..పవన్ కళ్యాణ్పై కేసులు పెట్టరా? ఒక వీడియో సందేశంలో ఏపీ పోలీసుల తీరును అనూష తప్పుపట్టారు. విజయవాడ కృష్ణా లంకలో జరిగిన 24 ఏళ్ల గాదె సాయి కృష్ణ లాకప్ డెత్ ఘటన నుంచి ప్రజల దృష్టిని మళ్లించడానికే తన భర్తను వరుసగా అరెస్ట్ చేస్తున్నారని ఆరోపించారు. కోర్టులు బెయిల్ ఇస్తున్నా, స్టేషన్ నుంచి స్టేషన్కు తిప్పుతూ వరుస కేసులు పెట్టడం కక్షపూరితమన్నారు. డిప్యూటీ సీఎం పవన్ కళ్యాణ్ గతంలో మాట్లాడిన మాటలనే రావణ్ కూడా మాట్లాడారని అనుష గుర్తు చేశారు. "ఒకరు మాట్లాడితే తప్పు కానిది, రావణ్ మాట్లాడితే ఎలా తప్పవుతుంది? మరి అవే కేసులను పవన్ కళ్యాణ్పై ఎందుకు నమోదు చేయరు?" అని ఆమె నిలదీశారు. తన చిన్న కూతురు తండ్రి కోసం అల్లాడిపోతోందని, ప్రశ్నించడమే తప్పయితే తమ కుటుంబాన్ని మొత్తాన్ని చంపేయాలని అనూష డిమాండ్ చేశారు. అవన్నీ మార్ఫింగ్ వీడియోలు ఒక మహిళతో రావణ్ ఉన్నట్లు మహా న్యూస్ ఛానల్ లో మార్ఫింగ్ (ఫ్యాబ్రికేటెడ్) వీడియోని ప్రసారం చేసిందని అనూష మండిపడ్డారు. చట్టపరంగా రావణ్ ను ఎదుర్కోలేక, తమ తప్పులను కప్పిపుచ్చుకోవడానికి ఇలాంటి కుట్రలు చేస్తున్నారని విమర్శించారు. సోషల్ మీడియాలో జరుగుతున్న దుష్ప్రచారాన్ని నమ్మవద్దని ఆమె ప్రజలను కోరారు. ఉపా కేసుపై స్పందించిన వైఎస్సార్సీపీ, సీపీఐ(ఎం) రావణ్పై UAPA చట్టాన్ని ప్రయోగించడాన్ని వైఎస్సార్ కాంగ్రెస్ పార్టీ, సీపీఐ(ఎం) తో పాటు పౌరసంఘాలు ఖండించాయి. చంద్రబాబు నేతృత్వంలోని కూటమి ప్రభుత్వం రాజకీయ కక్షసాధింపులకు పాల్పడుతోందని ఆరోపించాయి. వైఎస్సార్సీపీ అధ్యక్షుడు వైఎస్ జగన్ మోహన్ రెడ్డి 'X' (ట్విట్టర్) వేదికగా స్పందిస్తూ.. రాష్ట్రంలో లా అండ్ ఆర్డర్ పూర్తిగా క్షీణించిందని విమర్శించారు. కాకినాడలో జ్ఞానేశ్వరి అనే బాలిక అదృశ్యం, పెద్దపురంలో దివ్యాంగురాలిపై దాడి, కావలిలో గిరిజన మహిళపై దాడి,లాకప్ డెత్లను ప్రస్తావిస్తూ ప్రభుత్వం వీటిని వదిలేసి, ప్రశ్నించే వారిపై కఠినమైన నాన్-బేలబుల్ కేసులు పెడుతోందని మండిపడ్డారు. ఏపీకి జంగిల్ రాజ్ పాలన వద్దన్న జగన్, రాజ్యాంగబద్ధమైన పాలన కావాలని డిమాండ్ చేశారు. రావణ్పై మోపిన UAPA కేసులను వెంటనే ఉపసంహరించుకోవాలని సీపీఐ(ఎం) రాష్ట్ర కమిటీ డిమాండ్ చేసింది. జనసేన నాయకుల ఫిర్యాదుల మేరకే ఈ కేసులు నమోదవుతున్నాయని, ఇది ప్రభుత్వ పెద్దల ప్రమేయం లేకుండా సాధ్యం కాదని తెలిపింది. 2014 నుంచి కేంద్ర ప్రభుత్వం దేశవ్యాప్తంగా జర్నలిస్టులు, యాక్టివిస్టులపై దేశద్రోహం కేసులు పెట్టిన తీరునే ఏపీ కూటమి ప్రభుత్వం కూడా అనుసరిస్తోందని సీపీఐ(ఎం) విమర్శించింది.