RAAVAN ARREST | తన పరిధి ఏంటో తెలుసుకోవడానికి పవన్ కళ్యాణ్ కొంచెం చదువుకుంటే మంచిది.

కూటమి ప్రభుత్వ పాలనలో ఉన్న రాష్ట్రాన్ని ఆంధ్రప్రదేశ్ ఉప ముఖ్యమంత్రి పవన్ కళ్యాణ్ (Pawan Kalyan) తన సొంత జాగీరులా భావిస్తున్నట్లు కనిపిస్తోంది. చట్టాన్ని ఏమాత్రం లెక్కచేయకుండా, తనను విమర్శించే వాళ్లందర్నీ వేధించేలా పోలీసులపై ఆయన ఒత్తిడి తెస్తున్న తీరు, ఒక బాధ్యతాయుత పదవిలో ఉన్నానన్న స్పృహను మరిచిపోయి ఆయన చేస్తున్న వ్యాఖ్యలు.. చంద్రబాబు నాయుడు (Chandrababu Naidu) నేతృత్వంలోని కూటమి ప్రభుత్వానికి ఇబ్బంది కలిగించే అంశాలుగా మారుతున్నాయి. ఈ మధ్యకాలంలో యూట్యూబర్ జోసెఫ్ అలియాస్ రావణ్ అరెస్టు విషయంలో ఏపీ పోలీసులు వ్యవహరించిన తీరు జాతీయస్థాయిలో చర్చనీయాంశం అయింది. మేజిస్ట్రేట్ బెయిల్ ఇచ్చిన ప్రతిసారీ అతన్ని మళ్లీ మళ్లీ కస్టడీలోకి తీసుకుంటున్న విధానం విమర్శలపాలయింది. అరెస్ట్ చేయడం-బెయిల్ రావడం, మళ్లీ అరెస్ట్ చేయడం-బెయిల్ రావడం.. అలా రాత్రికి రాత్రే నాలుగోసారి కూడా అరెస్ట్ చేశారు. పవన్ కళ్యాణ్, ఆయన కుటుంబంపై అభ్యంతరకర వ్యాఖ్యలు చేశారనే ఆరోపణలతో జనసేన మద్దతుదారుల ఫిర్యాదుల ఆధారంగా ఆంధ్రప్రదేశ్ వ్యాప్తంగా దాదాపు 20 పోలీస్ స్టేషన్లలో రావణ్పై కేసులు నమోదయ్యాయి. ఈ నేపథ్యంలోనే జూన్ 30న రావణ్ను మొదట హైదరాబాద్లో అరెస్ట్ చేశారు. తరువాతి రోజే పిఠాపురం జిల్లా కోర్టు అతనికి బెయిల్ మంజూరు చేసింది. ఆ వెంటనే మరో కేసులో అరెస్ట్ చేస్తే, జూలై 2న మళ్లీ బెయిల్ వచ్చింది. ఆ తర్వాత ఇంకో కేసులో అరెస్ట్ చేయడం, మళ్లీ బెయిల్ రావడం.. చివరకు జూలై 3 రాత్రి నాలుగోసారి అతడిని రీ-అరెస్ట్ చేశారు. రావణ్కు బెయిల్ వచ్చిన వెంటనే అతన్ని మళ్లీ అరెస్ట్ చేయాలని ఉప ముఖ్యమంత్రి పవనే స్వయంగా స్టేషన్ హౌస్ ఆఫీసర్లకు (SHOs) ఫోన్లు చేసి ఆదేశిస్తున్నట్లు 'సౌత్ ఫస్ట్'కు విశ్వసనీయ వర్గాలు తెలిపాయి. ఇక రావణ్ను తీసుకెళ్లే పోలీస్ స్టేషన్లు, కోర్టుల దగ్గర జనసేన కార్యకర్తలు గుంపులుగా వెళ్తూ.. అతడిపై భౌతిక దాడికి ప్రయత్నిస్తున్నారు. బాధ్యతారాహిత్య చర్యలు - వ్యాఖ్యలు పవన్ కళ్యాణ్ రాష్ట్ర హోం మంత్రి కాదు. అలాంటప్పుడు వ్యక్తిగత కేసులో ఆయన ఏ హోదాలో పోలీసులకు ఆదేశాలు జారీ చేస్తున్నారన్నదే ఇప్పుడు అందరు అడుగుతున్న ప్రశ్న. వృత్తిపరమైన బాధ్యతలను వ్యక్తిగత విషయాలు ప్రభావితం చేయడం (Conflict of Interest) ప్రజాస్వామ్య స్పూర్తికి విరుద్దమన్న విషయం పవన్ కు తెలిసుంటే పోలీసులకే ఈ కేసులను వదిలేయాల్సింది. ఇంతేకాదు ముగ్గురు వేర్వేరు మేజిస్ట్రేట్లు వరుసగా మూడు రోజుల పాటు రావణ్కు జ్యుడీషియల్ రిమాండ్ నిరాకరిస్తూ బెయిల్ ఇవ్వడమంటే, నిందితుడిని జైలుకు పంపేలా ఆధారాలు లేవనే సంగతిని ఇప్పటికైనా గౌరవనీయ ఉప ముఖ్యమంత్రి గ్రహించి ఉండాల్సింది. ఉప ముఖ్యమంత్రి పదవిలో ఉన్నంత మాత్రాన ప్రభుత్వ వ్యవస్థలో ప్రత్యేక హోదా ఏమీ ఉండదని, అందరిలాగే ఆయన కూడా కేవలం మంత్రి అన్న నిజాన్ని కూడా ఆయన గుర్తుంచుకుంటే మంచిది. ఇక ఆయన చేస్తున్న వ్యాఖ్యలు కూడా అత్యంత బాధ్యతారాహిత్యంగా ఉంటున్నాయి. ప్రభుత్వాన్ని విమర్శించేవారు గీత దాటితే తొక్కిపారేస్తాం, తోలు తీస్తాం అంటూ ఒక సందర్భంలో హెచ్చరించారు. మరొక సమయంలో ప్రభుత్వాన్ని విమర్శించేవారిని చెప్పుతో కొట్టాలంటూ తన చెప్పు తీసి చూపించి పార్టీ కార్యకర్తలకు పిలుపునిచ్చారు. ఇటీవల రాష్ట్రంలో సంచలనం సృష్టించిన సాయికృష్ణ లాకప్ డెత్ విషయంలో బాధితుడి తరపున ఎందుకు మాట్లాడాలంటూ పవన్ ప్రశ్నించారు. నిందితుడు నేరం చేసినప్పటికీ, అతన్ని కస్టడీలో చంపే హక్కు పోలీసులకు ఉండదనే కనీస జ్ఞానం డిప్యూటీ సీఎంకు ఉండాలి కదా? ఆ తర్వాత అది లాకప్ డెత్ అని పోలీస్ ఉన్నతాధికారులు అంగీకరించి అందుకు కారణమైన సర్కిల్ ఇన్స్పెక్టర్ను (CI) అరెస్ట్ చేశారు. మరిప్పుడు పవన్ కళ్యాణ్ తన ముఖాన్ని ఎక్కడ దాచుకుంటారు? రావణ్ మాటల్ని ఎవరూ సమర్థించలేరు, కానీ అవి పవన్ చేసిన వ్యాఖ్యలకు ప్రతిచర్యగా వచ్చినవనే విషయాన్ని గుర్తించాలి. అయినప్పటికీ, డిప్యూటీ సీఎం అహంకారపూరిత ధోరణి చూస్తుంటే.. తానో ప్రజా సేవకుడన్న విషయాన్ని మరిచిపోయి, అపరిమిత అధికారాలున్న పాలకుడిలా ఆయన వ్యవహారశైలి ఉన్నట్టు స్పష్టంగా అర్థం అవుతోంది. కేబినెట్ సమావేశాలకు సరిగ్గా హాజరుకాని, ప్రభుత్వ పాలనా వ్యవహారాలపై పట్టులేని ఒక నాన్-సీరియస్ రాజకీయ నాయకుడైన పవన్ కళ్యాణ్ తన పరిధి ఏంటో తెలుసుకోవడానికి కొంచెం చదువుకుంటే మంచిది. 2014లో 'అర్నేష్ కుమార్ వర్సెస్ స్టేట్ ఆఫ్ బీహార్' కేసులో సుప్రీం కోర్టు రెండు ముఖ్యమైన మార్గదర్శకాలను ఇచ్చింది. నిందితుడు పారిపోతాడని, ఆధారాలను తారుమారు చేస్తాడని లేదా సాక్షులను బెదిరిస్తాడని నమ్మడానికి బలమైన కారణాలు ఉంటేనే పోలీసులు అరెస్ట్ చేయాలి. మేజిస్ట్రేట్లు యాంత్రికంగా రిమాండ్ విధించకూడదు. నిందితుడికి నోటీసులు ఇవ్వడం వంటి అన్ని చట్టపరమైన ప్రక్రియలు సరిగ్గా జరిగాయో లేదో పరిశీలించాలి. కానీ రావణ్ కేసులో ఇందులో ఏ ఒక్క నియమాన్నీ పోలీసులు పాటించలేదు.అలాగే ఇటీవల బాంబే హైకోర్టు న్యాయమూర్తి జస్టిస్ మాధవ్ జామదార్ చేసిన వ్యాఖ్యలను ఇక్కడ ప్రస్తావించడం అత్యవసరం. "అమిత్ షా ముర్దాబాద్" అని నినాదాలు చేసినందుకు ఒక రాజకీయ కార్యకర్తను ముంబై నుంచి బహిష్కరించిన కేసును విచారిస్తూ.. " ప్రధానమంత్రికో, ముఖ్యమంత్రికో పోలీసులు నౌకర్లు కాదు" అని జడ్జి గుర్తుచేశారు. దళిత ఓటు బ్యాంక్ పై కూటమి నేతల ఆందోళన అంబేద్కరిస్ట్ అయిన రావణ్ను కూటమి ప్రభుత్వం కక్షపూరితంగా వేధిస్తోందని సోషల్ మీడియాలో తీవ్ర వ్యతిరేకత వస్తోంది. ఈ పరిణామం భవిష్యత్తులో కూటమి గెలుపు అవకాశాలపై ప్రభావం చూపుతుందని కొంతమంది తెలుగుదేశం నాయకులు ఆందోళన చెందుతున్నారు. పవన్ కళ్యాణ్ చేసే పనులతో దళితుల దృష్టిలో తెలుగుదేశం పార్టీ ఎందుకు అప్రతిష్ట కావాలన్న చర్చ ఇప్పుడు టీడీపీలో నడుస్తోంది. ఇక్కడో ముఖ్యమైన విషయాన్ని చెప్పుకోవాలి. పవన్ కళ్యాణ్ ప్రభావం కేవలం ఆయన సామాజిక వర్గం కాపులు ఎక్కువగా ఉన్న ఉభయ గోదావరి జిల్లాలకే పరిమితం. కానీ ఆంధ్రప్రదేశ్ వ్యాప్తంగా భారీ సంఖ్యలో దళితులు ఉన్నారు. రేపు రేపు రాజకీయంగా ఏదైనా నష్టం జరిగితే ప్రభుత్వ పెద్ద చంద్రబాబు నాయుడికే ఇబ్బంది. ఇప్పటికైనా ఆయన జోక్యం చేసుకుని, తన డిప్యూటీ సీఎంకు కాస్త ‘పద్ధతి’ నేర్పాల్సిన సమయం వచ్చింది. వ్యాసకర్త :- జి.ఎస్. వాసు