అత్యున్న‌త పుర‌స్కారంతో ప్ర‌ధాని మోదీని స‌త్క‌రించిన ఇండోనేషియా

భారత ప్రధాని నరేంద్ర మోడీ ఇండోనేషియా పర్యటన అంతర్జాతీయంగా పెద్ద చర్చకు దారితీసింది. ప్రపంచంలోనే అత్యధిక ముస్లిం జనాభా ఉన్న ఇండోనేషియాలో అడుగుపెట్టిన భారత ప్రధానికి అక్కడి ప్రభుత్వం ఒక అరుదైన, అత్యున్నత గౌరవాన్ని అందించింది. మోడీ ప్రయాణిస్తున్న ఎయిర్ ఇండియా వన్ విమానం ఇండోనేషియా గగనతలంలోకి ప్రవేశించగానే ఆ దేశ వైమానిక దళానికి చెందిన ఎఫ్-16, సుఖోయ్-30 ఫైటర్ జెట్లు ఇరువైపులా చేరి సురక్షితంగా జకార్తాలో ల్యాండ్ అయ్యే వరకు ఎస్కార్ట్గా నిలిచాయి. ఇండోనేషియా చరిత్రలో చైనా తర్వాత ఒక విదేశీ అధినేతకు ఇలాంటి స్వాగతం దక్కడం ఇది కేవలం రెండోసారి మాత్రమే కావడం విశేషం. ప్రోటోకాల్ను పక్కన పెట్టిన ప్రబోవో ఈ పర్యటనలో ఇండోనేషియా అధ్యక్షుడు ప్రబోవో సుబియాంటో సాధారణ ప్రోటోకాల్ను పక్కన పెట్టి, స్వయంగా ఎయిర్పోర్టుకు వచ్చి భారత ప్రధానికి ఆత్మీయ ఆలింగనంతో స్వాగతం పలికారు. గతంలో చైనా అధ్యక్షుడు షి జిన్ పింగ్ 2022లో బాలి వచ్చినప్పుడు ఫైటర్ జెట్ ఎస్కార్ట్ లభించినా, ఆ దేశ అధ్యక్షుడు ఎయిర్పోర్ట్కు రాలేదు. అంతకుముందు 2017లో సౌదీ రాజు సల్మాన్ బిన్ అబ్దుల్ అజీజ్ పర్యటన తర్వాత.. ఫైటర్ జెట్ల ఎస్కార్ట్ తో పాటు ప్రెసిడెంట్ స్వయంగా వచ్చి సాదర స్వాగతం చెప్పిన గౌరవంకేవలం నరేంద్ర మోడీకి మాత్రమే దక్కింది . అత్యున్నత పురస్కారం జకార్తాలో జరిగిన అధికారిక కార్యక్రమంలో ఇండోనేషియా ప్రభుత్వం ప్రధాని మోడీని తమ దేశ అత్యున్నత సివిలియన్ పురస్కారమైన ‘బిన్ టాంగ్ ఆదిపూర్ణ’ (Bintang Adipurna) మెడల్తో ఘనంగా సత్కరించింది. దేశ ఐక్యత, సమగ్రత, మరియు శ్రేయస్సు కోసం అసాధారణంగా పాటుపడే వ్యక్తులకు ఇండోనేషియా ప్రభుత్వం ఈ ప్రతిష్టాత్మక అవార్డును అందిస్తుంది. ఇండోనేషియా అధ్యక్షుడు ప్రబోవో సుబియాంటో స్వయంగా ఈ మెడల్ను మోడీకి బహూకరించారు. ఈ గౌరవం కోట్లాది మంది భారతీయులకు మరియు ఇరు దేశాల మధ్య ఉన్న చారిత్రక బంధానికి దక్కిన గౌరవంగా పీఎంఓ కార్యాలయం ట్విట్టర్ (X) ద్వారా పేర్కొంది. వ్యూహాత్మక బంధం.. రిటర్న్ గిఫ్ట్ ఈ అసాధారణ ఆతిథ్యం వెనుక బలమైన ఆర్థిక, రక్షణ సమీకరణాలు ఉన్నాయి. గత ఏడాది భారత గణతంత్ర దినోత్సవ వేడుకలకు (జనవరి 26, 2025) ఇండోనేషియా అధ్యక్షుడు ప్రబోవో సుబియాంటో ముఖ్య అతిథిగా హాజరయ్యారు. అప్పుడు లభించిన ఆతిథ్యానికి, ఇరు దేశాల మధ్య ఉన్న సమగ్ర వ్యూహాత్మక భాగస్వామ్యానికి గుర్తుగా ఈ ‘రిటర్న్ గిఫ్ట్’ లభించిందని విశ్లేషకులు భావిస్తున్నారు. ముఖ్యంగా ఇండో-పసిఫిక్ రీజియన్లో చైనా దూకుడును అడ్డుకోవడానికి భారత్-ఇండోనేషియాల రక్షణ బంధం ఎంత బలంగా ఉందో ఈ పర్యటన ద్వారా ప్రపంచానికి స్పష్టమైన సంకేతాలు వెళ్లాయి.