హైదరాబాద్ మెట్రో ఫేజ్-2కు బ్రేకులు? కేంద్ర మంత్రులకు సీఎం రేవంత్ రెడ్డి లేఖలు

హైదరాబాద్ నగరవాసులను ట్రాఫిక్ నరకం నుంచి కాపాడుతున్న మెట్రో రైల్ ప్రాజెక్ట్ విస్తరణపై నీలినీడలు కమ్ముకుంటున్నాయా? అంటే అవుననే అంటున్నాయి తాజా పరిణామాలు. ఫేజ్-2 విస్తరణ పనులు అనుకున్నంత వేగంగా ముందుకు సాగకపోవడంపై తెలంగాణ ప్రభుత్వం తీవ్ర ఆందోళన చెందుతోంది. ఆలస్యం అయ్యే కొద్దీ నిర్మాణ ఖర్చులు భారీగా పెరిగిపోతాయని భావిస్తున్న సీఎం రేవంత్ రెడ్డి.. ఈ వ్యవహారంపై ఆదివారం కేంద్ర మంత్రులు మనోహర్ లాల్ ఖట్టర్, కిషన్ రెడ్డిలకు అత్యవసర లేఖలు రాశారు. ఢిల్లీ సమావేశంలో నిర్ణయించిన ప్రకారం వెంటనే గైడ్లైన్స్ ఖరారు చేయాలని డిమాండ్ చేశారు. ఎస్బీఐ క్యాప్స్కు అప్పగింత ఎప్పుడు? గత నెల (జూన్ 23, 24 తేదీల్లో) ఢిల్లీలో జరిగిన హై-లెవెల్ మీటింగ్ లో హైదరాబాద్ మెట్రోపై సమగ్ర అధ్యయనం చేసే బాధ్యతలను 'ఎస్బీఐ క్యాప్స్' (SBI Caps) కి అప్పగించాలని కేంద్ర, రాష్ట్ర ప్రభుత్వాలు సంయుక్తంగా నిర్ణయించాయి. మెట్రో ఫేజ్-1 స్వాధీన ప్రక్రియ, ఫేజ్-2 విస్తరణ.. ఈ రెండూ ఆర్థికంగా ఒకదానితో ఒకటి లింక్ అయి ఉన్నాయి.అందుకే ఆస్తులు, రీఫైనాన్సింగ్, ఫ్యూచర్ లోన్స్ లాంటి కీలక అంశాలన్నింటినీ కలిపి స్టడీ చేయాలని భావించారు. ఈ ప్రక్రియను వేగవంతం చేసేందుకు తెలంగాణ ప్రభుత్వం తరఫున మున్సిపల్ శాఖ స్పెషల్ చీఫ్ సెక్రటరీని కోఆర్డినేటర్గా కూడా నియమించారు. కానీ, కేంద్రం మాత్రం ఇప్పటివరకు ఎస్బీఐ క్యాప్స్కి అఫీషియల్గా ఎలాంటి బాధ్యతలు అప్పగించలేదు. కనీసం ‘టర్మ్స్ ఆఫ్ రిఫరెన్స్’ (Terms of Reference) కూడా ఫైనల్ చేసి పంపించలేదని సీఎం రేవంత్ రెడ్డి తన లేఖలో ప్రస్తావించారు. వేల కోట్ల అదనపు భారం.. కిషన్ రెడ్డి జోక్యం చేసుకోవాలి. కేంద్రం వైఖరితో జరుగుతున్న ఆలస్యం కారణంగా ఫేజ్-1 స్వాధీన ప్రక్రియలో గందరగోళం పెరిగి, రోజువారీ నిర్వహణలో సమస్యలు వస్తున్నాయని సీఎం తెలిపారు. అలాగే ఫేజ్-2 డీపీఆర్ల (DPR) అప్రూవల్, నిధుల సేకరణ కూడా ఆలస్యం అవుతోందని.. దీంతో మెట్రో ఫేజ్-2 మొత్తం ప్రాజెక్టు వ్యయం విపరీతంగా పెరిగే ప్రమాదం ఉందని హెచ్చరించారు. ఈ విషయంలో కేంద్ర మంత్రి కిషన్ రెడ్డి ప్రత్యేక శ్రద్ధ తీసుకుని, వివిధ కేంద్ర ప్రభుత్వ శాఖల మధ్య సమన్వయం కుదిరేలా వ్యక్తిగతంగా జోక్యం చేసుకోవాలని రేవంత్ రెడ్డి కోరారు. 5 శాతం పెరగనున్న డీపీఆర్ వాల్యూ? తెలంగాణ ప్రభుత్వం ఇప్పటికే రూ. 43,000 కోట్ల పైచిలుకు అంచనాతో మెట్రో సెకండ్ ఫేజ్ డీపీఆర్ను కేంద్రానికి పంపించింది. కానీ ఇప్పుడు ఎస్బీఐ క్యాప్స్తో మళ్లీ మదింపు చేయించాలన్న కేంద్రం నిర్ణయంతో, కొత్తగా డీపీఆర్ రెడీ చేయాల్సి ఉంటుంది. ఫలితంగా ప్రస్తుతం ఉన్న ఎస్టిమేషన్ వాల్యూ మరో 5 శాతం పెరిగిపోతుందని అంచనా వేస్తున్నారు. అంటే ప్రాజెక్ట్ ఆలస్యంతో తెలంగాణపై మరికొన్ని వందల కోట్ల అదనపు భారం పడబోతోంది. కొత్త కోచ్లు రావాలంటే.. మరో రెండేళ్లు వెయిట్ చేయాల్సిందేనా? మెట్రో స్వాధీన ప్రక్రియ త్వరగా పూర్తైతే, నగర రద్దీకి తగ్గట్టుగా 60 కొత్త కోచ్లను కొనాలని మున్సిపల్ శాఖ ప్లాన్ చేసింది. దీనికోసం బెంగళూరుకు చెందిన 'భారత్ ఎర్త్ మూవర్స్ లిమిటెడ్' (BEML) తో చర్చలు కూడా జరిగాయి. కానీ ప్రస్తుత పరిస్థితులను బట్టి చూస్తే.. ఎస్బీఐ క్యాప్స్ రిపోర్ట్ రావడం, తక్కువ వడ్డీకి లోన్ ఇచ్చే గ్లోబల్ సంస్థలను వెతకడం.. ఈ ప్రాసెస్ అంతా ముగియడానికే కనీసం ఏడాది సమయం పడుతుందని మెట్రో అధికారులు అంతర్గతంగా అంచనా వేస్తున్నారు. అప్పటివరకు కొత్త కోచ్ల కొనుగోలు ప్రక్రియ ముందుకు పడే ఛాన్స్ లేదు. ఒకవేళ అంతా సజావుగా సాగి ఆర్డర్ ఇచ్చినా, ఆ కోచ్లు డెలివరీ కావడానికి ఇంకో 15 నెలలు పడుతుంది. అంటే, హైదరాబాద్ వాసులకు మెట్రోలో కొత్త బోగీల ప్రయాణం సాకారం కావాలంటే కనీసం ఇంకో రెండేళ్లు నిరీక్షించక తప్పదు. భాగ్యనగర అభివృద్ధిలో మెట్రో రైల్ అత్యంత కీలకమైన పాత్ర పోషిస్తోంది. అలాంటి మెట్రో ఫేజ్-2 విస్తరణ ఇలా నిధులు, అనుమతుల సాకుతో ఆలస్యం కావడం నగరవాసులకు పెద్ద బ్యాడ్ న్యూస్ అనే చెప్పాలి. మరి సీఎం రేవంత్ రెడ్డి రాసిన ఈ ఘాటు లేఖలపై కేంద్ర మంత్రులు మనోహర్ లాల్ ఖట్టర్, కిషన్ రెడ్డి ఎలా స్పందిస్తారో, మెట్రో ఫైళ్లను ఎంత వేగంగా క్లియర్ చేస్తారో చూడాలి.