AYODHYA | రామ్ మందిర్ ట్రస్ట్ కీలక నిర్ణయం: చంపత్ రాయ్ రాజీనామా ఆమోదం..కొత్త జనరల్ సెక్రటరీ గా విహెచ్‌పి నేత

అయోధ్య రామాలయ విరాళాల చోరీ వివాదం (Donation Embezzlement Case) దేశవ్యాప్తంగా హాట్ టాపిక్గా మారిన వేళ.. శ్రీరామ జన్మభూమి తీర్థ క్షేత్ర ట్రస్ట్ సంచలన నిర్ణయాలు తీసుకుంది. ఆరోపణలు ఎదుర్కుంటున్న జనరల్ సెక్రటరీ చంపత్ రాయ్, ట్రస్టీ అనిల్ మిశ్రాల రాజీనామాలను సోమవారం నిర్వహించిన అత్యవసర సమావేశంలో ఆమోదించింది. చంపత్ రాయ్ రాజీనామాతో ఖాళీ అయిన జనరల్ సెక్రటరీ పదవిలో విహెచ్పి (VHP) అంతర్జాతీయ ప్రధాన కార్యదర్శి భజరంగ్ బాగ్రా నియమితులయ్యారు. రాజస్థాన్లోని సికార్ జిల్లాకు చెందిన బాగ్రా వృత్తిరీత్యా చార్టర్డ్ అకౌంటెంట్ (CA).అంతేకాకుండా, ప్రభుత్వ రంగ నవరత్న సంస్థ 'నాల్కో' (NALCO - National Aluminium Company Limited) మాజీ చైర్మన్ అండ్ మేనేజింగ్ డైరెక్టర్ (CMD) గా పనిచేశారు. ఆ సంస్థ నుండి విఆర్ఎస్ (VRS) తీసుకున్న తర్వాత ఆయన విహెచ్పిలో చేరారు. నిజాయితీ నిరూపించుకునేందుకే రాజీనామా: స్వామి గోవింద్ దేవ్ గిరి సమావేశం అనంతరం ట్రస్ట్ ట్రెజరర్ స్వామి గోవింద్ దేవ్ గిరి మీడియాతో మాట్లాడారు. ఈ వివాదం తమను తీవ్రంగా బాధించిందన్నారు. దొంగతనం ఎంత జరిగిందన్నది ముఖ్యం కాదని, ఇలాంటి పరిస్థితి రావడమే విచారకమన్నారు. నిందితులను పట్టుకుని శిక్షించే వరకు తాను పదవిలో కొనసాగడం సమంజసం కాదని భావించి చంపత్ రాయ్ సమావేశానికి ముందే రాజీనామా సమర్పించారని తెలిపారు. ట్రస్ట్ నిబంధనల ప్రకారం రాజీనామా లేఖ అందిన వెంటనే అది అమలులోకి వస్తుందని, అందుకే దాన్ని ఆమోదించక తప్పలేదని స్పష్టం చేశారు. ఈ సందర్భంగా రామ్ మందిర్ ఉద్యమంలో చంపత్ రాయ్ చేసిన సేవలను ఆయన ప్రశంసించారు. భక్తుల విరాళాలు అన్నీ భద్రం.. పుకార్లను నమ్మొద్దు స్వామి గోవింద్ దేవ్ గిరి మాట్లాడుతూ..ఆలయానికి వచ్చిన విరాళాలు, విలువైన వస్తువులు మాయమయ్యాయనే ఆరోపణలను ఖండించారు. ట్రస్ట్ దగ్గర దాదాపు 2,800 విరాళాల వస్తువుల రిజిస్టర్ ఉందని, ప్రతి ఒక్క వస్తువు సురక్షితంగా ఉందని ఆయన స్పష్టం చేశారు. బంగారు పూతపూసిన రామాయణం పుస్తకం, శ్రీరాముడి పవిత్ర పాద ముద్రలు, ఒక నెక్లెస్, కాగ్భుశుండి విగ్రహాన్ని ప్రెస్ కాన్ఫరెన్స్లో ప్రదర్శించారు. గతంలో కరసేవకులపై కాల్పులు జరిపిన వారు, రాముడి ఉనికినే ప్రశ్నించిన వారు ఇప్పుడు తమకు రామభక్తి గురించి హితబోధలు చేస్తున్నారని విమర్శించారు. అనుమానాలు ఉన్నవారు నేరుగా ట్రస్ట్ ఆఫీస్ రికార్డులను పరిశీలించవచ్చని, సోషల్ మీడియా పుకార్లను నమ్మవద్దని భక్తులకు విజ్ఞప్తి చేశారు.