హమ్మయ్యా గ్యాస్ పై గుడ్ న్యూస్..కేంద్ర ప్రభుత్వం ఈ నెల నుంచి చేస్తున్న ఈ మార్పుల గురించి మీకు తెలుసా?

కొత్త నెలలోకి అడుగుపెట్టాం.. వివిధ పాలసీలలో ఎప్పటికప్పుడు కొత్త మార్పులు చేస్తున్న కేంద్ర ప్రభుత్వం... ఈ నెల నుంచి కూడా కొన్ని అంశాల్లో కొన్ని కీలక మార్పులు చేసింది. ముఖ్యంగా పాస్పోర్ట్ ధరలు, గ్యాస్ సిలిండర్, ఇంధన ధరలతో పాటు .. రైలు టికెట్స్, ఐటీఆర్ డెడ్లైన్ లాంటి విషయంలో కూడా అప్డేట్స్ ఇచ్చింది. అవేంటో చూద్దాం పాస్పోర్ట్ సేవలు ఇక మరింత భారం విదేశాలకు వెళ్లాలనుకునే వారికి ప్రభుత్వం గట్టి షాక్ ఇచ్చింది. జూలై 1 నుంచి పాస్పోర్ట్ ఫీజులను భారీగా పెంచుతూ విదేశీ వ్యవహారాల మంత్రిత్వ శాఖ నిర్ణయం తీసుకుంది. వేర్వేరు కేటగిరీల్లో పెరిగిన కొత్త ధరల వివరాలు ఇలా ఉన్నాయి: నార్మల్ పాస్పోర్ట్ (36 పేజీలు): దీని ఫీజు గతంలో రూ. 1,500 ఉండగా, ఇవాళ్టి నుంచి అది ఏకంగా రూ. 2,500 లకు పెరిగింది. తత్కాల్ పాస్పోర్ట్: అత్యవసరంగా పాస్పోర్ట్ పొందాలనుకునే వారి నుంచి వసూలు చేసే తత్కాల్ ఫీజును రూ. 3,500 నుంచి రూ. 5,000 కి పెంచారు. పెద్ద పాస్పోర్ట్ (60 పేజీలు): ఎక్కువ పేజీలు ఉండే ఈ పాస్పోర్ట్ ధరను రూ. 3,500 నుంచి ఒకేసారి రూ. 6,000 లకు సవరించారు. డూప్లికేట్ పాస్పోర్ట్: ఒకవేళ పాస్పోర్ట్ పోయినా లేదా దెబ్బతిన్నా కొత్తదాని కోసం గతంలో రూ. 1,750 చెల్లించాల్సి ఉండేది. కానీ ఇకపై కస్టమర్లు ఏకంగా రూ. 4,250 చెల్లించాల్సిందే. వాణిజ్య సిలిండర్పై రూ.183 తగ్గింపు వ్యాపార, పారిశ్రామిక వినియోగదారులకు చమురు మార్కెటింగ్ కంపెనీలు (OMCs) పెద్ద ఊరటనిచ్చాయి. 19 కేజీల వాణిజ్య (కమర్షియల్) సిలిండర్పై రూ.183 తగ్గిస్తున్నట్లు అధికారిక ప్రకటన వెలువడింది. పశ్చిమాసియాలో అంతర్జాతీయ ఉద్రిక్తతలు కాస్త తగ్గుముఖం పట్టడం, ఎల్పీజీ (LPG) సరఫరా లైన్లు మెరుగుపడటంతో చమురు సంస్థలు ఈ నిర్ణయం తీసుకున్నాయి. ఈ తగ్గింపుతో దేశ రాజధాని ఢిల్లీలో నిన్నటివరకు రూ.3,113 గా ఉన్న వాణిజ్య సిలిండర్ ధర, ఇవాళ్టి నుంచి రూ.2,930 కే లభ్యం కానుంది. ఇదే క్రమంలో దేశీయంగా ఎల్పీజీ ఉత్పత్తి పెరగడం, విదేశాల నుంచి దిగుమతులు అనుకూలించడంతో హోటళ్లు, రెస్టారెంట్ల వంటి వాణిజ్య వినియోగదారులపై గతంలో విధించిన వంటగ్యాస్ సరఫరా ఆంక్షలను కేంద్ర ప్రభుత్వం పూర్తిగా తొలగించింది. యుద్ధ సంక్షోభానికి ముందున్న స్థాయికి సరఫరాలను పునరుద్ధరించినట్లు పెట్రోలియం మంత్రిత్వ శాఖ స్పష్టం చేసింది. ఆధార్ లో చిన్న ఊరట.. ఆధార్ లో మార్పుచేర్పులు చేసుకోవాలి అనుకునేవాళ్లకు యుఐడిఎఐ (UIDAI) చిన్న ఉపశమనం కలిగించింది. కార్డులో ఈమెయిల్ ఐడీని అప్డేట్ చేసుకోవడానికి గతంలో రూ. 75 వసూలు చేసేవారు. అయితే ఇవాళ జూలై 1 నుంచి వచ్చే ఆరు నెలల పాటు ఈ ఫీజును పూర్తిగా మాఫీ చేస్తున్నట్లు ప్రకటించింది. SBI క్రెడిట్కార్డు యూజర్లకు షాక్ దేశీయ బ్యాంకింగ్ దిగ్గజం స్టేట్ బ్యాంక్ ఆఫ్ ఇండియా (SBI) తన క్రెడిట్ కార్డ్ కస్టమర్లకు షాక్ ఇచ్చింది. ఫోన్పేతో కలిసి తీసుకొచ్చిన కో బ్రాండెడ్ క్రెడిట్ కార్డుల రివార్డు పాయింట్ ప్రోగ్రామ్లో మార్పులు చేసింది. ఫోన్పే ఎస్బీఐ క్రెడిట్ కార్డ్ పర్పుల్ , ఫోన్పే ఎస్బీఐ క్రెడిట్ కార్డ్ సెలెక్ట్ బ్లాక్ రివార్డు పాయింట్లకు కొత్త పరిమితులను నిర్దేశించింది. ఈ రూల్స్ ప్రకారం.. డొమెస్టిక్ ఎయిర్పోర్ట్ లాంజ్లో యాక్సెస్ కావాలంటే గడిచిన మూడు నెలల్లో రూ.60,000 స్పెండ్ చేసి ఉండాలి. మిస్-సెల్లింగ్కు చెక్ పెట్టేలా ఆర్బీఐ కొత్త రూల్ బ్యాంకులు లేదా ఆర్థిక సంస్థలు కస్టమర్లను తప్పుదోవ పట్టించి, అవాస్తవాలు చెప్పి తమ బీమా లేదా లోన్ ప్రొడక్ట్స్ను బలవంతంగా అంటగట్టడాన్ని (Miss-selling) అరికట్టేందుకు రిజర్వ్ బ్యాంక్ ఆఫ్ ఇండియా (RBI) కఠినమైన రూల్ తీసుకొచ్చింది. ఇలాంటి మోసపూరిత విక్రయాలతో నష్టపోయిన కస్టమర్లు ఇవాళ్టి నుంచి పూర్తి రీఫండ్ (డబ్బు వెనక్కి పొందడం) తో పాటు, సదరు సంస్థల నుంచి నష్టపరిహారం కూడా క్లెయిమ్ చేసుకునేందుకు అర్హులని ఆర్బీఐ స్పష్టం చేసింది. బ్యాంకింగ్ రంగంలో పారదర్శకతను పెంచేందుకు ఈ నిబంధన ఉపయోగపడనుందని నిపుణులు భావిస్తున్నారు. రైళ్లలో టిక్కెట్ లేకుంటే ఫీజు రెట్టింపు రైళ్లలో టికెట్ లేకుండా ప్రయాణించే వారి విషయంలో భారతీయ రైల్వే శాఖ నిబంధనలను మరింత కఠినతరం చేసింది. జూలై 1 నుంచి అమల్లోకి వచ్చిన కొత్త మార్పుల ప్రకారం, ఇకపై టికెట్ లేకుండా ప్రయాణిస్తే వసూలు చేసే కనీస జరిమానాను (పెనాల్టీ) ప్రభుత్వం రెట్టింపు చేసింది. రైళ్లలో టికెట్ లేకుండా ప్రయాణిస్తూ పట్టుబడితే గతంలో రూ.250 గా ఉన్న కనీస ఫీజును ఇప్పుడు రూ.500 లకు పెంచారు. అయితే, రైల్వే నిబంధనల ఉల్లంఘనకు సంబంధించి కోర్టులు విధించే శిక్షా కాలంలో ఎలాంటి మార్పులు చేయలేదని అధికారులు స్పష్టం చేశారు. రైళ్లలో అక్రమంగా ప్రయాణించే వారికి కోర్టు విధించే ఆరు నెలల వరకు జైలు శిక్ష, అలాగే రూ.1,000 గరిష్ట జరిమానా నిబంధనలు యథాతథంగా కొనసాగుతాయని రైల్వే వర్గాలు వెల్లడించాయి. ఐటీఆర్ డెడ్లైన్ ఐటీఆర్-1, ఐటీఆర్-2 రిటర్నుల దాఖలు గడువు జులై 31తో ముగియనుంది. 2025-26 ఆర్థిక సంవత్సరానికి సంబంధించి ప్రాథమిక పన్ను మినహాయింపు పరిమితి దాటిన ప్రతి ఒక్కరూ రిటర్నులు దాఖలు చేయాల్సి ఉంటుంది. డెడ్లైన్లోపు రిటర్నలు దాఖలు చేయకుంటే పెనాల్టీతో పాటు కొన్ని సందర్భాల్లో నష్టాలను నెక్స్ట్ ఇయర్స్ కి ట్రాన్సఫర్ చేసుకునే అవకాశం కూడా కోల్పోవాల్సి రావచ్చు. ఓవరాల్గా చూసుకుంటే ఈ జూలై 1 నుంచి వచ్చిన ఈ కొత్త నియమాలు, మార్పులు సామాన్యుడి బడ్జెట్ పై మిశ్రమ ప్రభావాన్ని చూపబోతున్నాయి. ఒకవైపు కమర్షియల్ గ్యాస్ సిలిండర్ రేట్ భారీగా తగ్గడం, ఆధార్ ఈమెయిల్ అప్డేట్ ఫ్రీ చేయడం డెఫినెట్గా గుడ్ న్యూసే కావొచ్చు కానీ విదేశాలకు వెళ్లాలనుకునే మధ్యతరగతి జనాలకు షాక్ ఇచ్చేలా పాస్పోర్ట్ ఫీజులను ఆల్మోస్ట్ డబుల్ చేయడం, ఎస్బీఐ క్రెడిట్ కార్డ్ బెనిఫిట్స్ కి క్యాపింగ్ పెట్టడం లాంటివి కొంచెం ఖర్చు పెంచే నిర్ణయాలని చెప్పవచ్చు. వీటన్నింటితో పాటు జూలై 31 ఐటీఆర్ డెడ్లైన్ కూడా దగ్గరపడుతోంది కాబట్టి.. ఎలాంటి లేట్ ఫీజ్ పడకుండా ఉండాలంటే ఇప్పుడే మీ ఫైనాన్షియల్ ప్లాన్ ని సెట్ చేసుకోండి.