Seasonal diseases | వానొస్తే… వరదతో పాటు వ్యాధులూ వస్తాయి. ఈ సీజన్ లో హాస్పిటల్ బెడ్ మీద ఉండొద్దంటే ఆ ఆర్టికల్ ను చివరిదాకా చదవండి.

మొన్నటిదాకా భగభగమండే ఎండలతో మనల్ని భయపెట్టిన సూర్యభగవానుడు కాస్త రిలాక్స్ అయ్యాడు. సమ్మర్ హీట్ కు బ్రేక్ ఇవ్వడంతో మాన్ సూన్ సీజన్ మొదలైంది. ఎల్ నినో ప్రభావం ఉన్నప్పటికీ దేశవ్యాప్తంగా వర్షాలు కురుస్తుండడంతో వాతావరణం కూల్ అయింది. వానమ్మ వచ్చిందని సంబరపడడంలో తప్పు లేదు కాని దాంతో పాటు వ్యాధులు కూడా వచ్చే ప్రమాదం ఉందన్న సంగతిని మనం మర్చిపోకూడదు. ఉష్ణోగ్రతలు తగ్గడంతో పాటు ఈ సమయంలో గాలిలో ఉండే తేమశాతం (హ్యుమిడిటీ) తో ఎన్నో రకాల బ్యాక్టీరియాలు, వైరస్ లు వ్యాప్తి చెందే అవకాశం ఏర్పడుతుంది. దీంతో రోగనిరోధక శక్తి (ఇమ్యూనిటీ) తక్కువగా ఉన్నవాళ్లకు చాలా ఈజీగా జలుబు, జ్వరం, గొంతునొప్పి తో పాటు జీర్ణ సంబంధిత సమస్యలు (గట్ ప్రాబ్లం) వచ్చే అవకాశం ఎక్కువగా ఉంటుందని డాక్టర్లు హెచ్చరిస్తున్నారు. అందుకే ఈ వర్షాకాలంలో కలిగే వాతావరణ మార్పులను తట్టుకునేలా శరీరాన్ని బలంగా, ఆరోగ్యంగా ఉంచుకోవడానికి రోజు వారీ జీవనశైలితో పాటు ఆహార నియమాల్లో కొన్ని మార్పులు చేసుకోవడం ఎంతో అవసరమని సూచిస్తున్నారు. మన ఆరోగ్యాన్ని కాపాడుకోవడానికి ఆరోగ్య నిపుణులు చెబుతున్న ముఖ్యమైన జాగ్రత్తలివే: రోగనిరోధక శక్తిని పెంచే ఆహారాలు ఈ కాలంలో ఇన్ఫెక్షన్ల బారిన పడకుండా ఉండాలంటే శరీరానికి రక్షణ, బలాన్ని అందించే పోషకాలు చాలా అవసరం. మిల్లెట్స్ - పప్పులు నాన్ వెజ్ తినని వాళ్లకు కావాల్సిన ప్రోటీన్ ను కందిపప్పు, శనగపప్పు లాంటి పప్పుధాన్యాలు అందిస్తాయి. వీటితో పాటు జొన్నలు, సజ్జలు, కొర్రలు వంటి మిల్లెట్స్ ను తినే ఆహారంలో భాగం చేసుకుంటే శరీరానికి కావాల్సిన ఎనర్జీ, ప్రోటీన్, ఫైబర్ లభిస్తుంది. ఫలితంగా జీర్ణక్రియ సజావుగా సాగడంతో పాటు రోగనిరోధక శక్తి కూడా పెరుగుతుంది. ఈ పదార్థాలను వేడివేడిగా వండుకుని తింటే శరీరానికి ఎంతో మేలు కలుగుతుంది. కూరగాయలు- సీజనల్ పండ్లు ఐరన్, కాల్షియం, విటమిన్లు పుష్కలంగా ఉండే మునగకాయ, క్యారెట్లు, బీట్రూట్, గుమ్మడికాయ వంటి కూరగాయలను క్రమం తప్పకుండా తీసుకోవాలి. అలాగే ఈ కాలంలో దొరికే పియర్స్, ఆపిల్, దానిమ్మ, చెర్రీస్, నారింజ, జామ, ఉసిరికాయ వంటి పండ్లలో విటమిన్ సి తో పాటు యాంటీఆక్సిడెంట్లు మస్తుగా ఉంటాయి. ఇవి రోగనిరోధక వ్యవస్థను బలోపేతం చేస్తాయి. వంటింటి మసాలాలు మన వంటింట్లో దొరికే సహజ మసాలాలు అద్భుతమైన ఔషధాలుగా పనిచేస్తాయి.అల్లం, వెల్లుల్లి, మిరియాలు, పసుపు, దాల్చినచెక్క వంటి వాటికి వ్యాధి నిరోధక శక్తిని పెంచే సామర్థ్యం ఉంది. వీటిని రసం, సూప్ లేదా మూలికా పానీయాలలో కలుపుకుని తాగితే గొంతు, శ్వాసకోశ మార్గం ఆరోగ్యంగా ఉంటుంది. మెటబాలిజం పెంచడానికి , శరీరాన్ని వెచ్చగా ఉంచడానికి గోరువెచ్చని నీరు, సుక్కు కషాయం, హెర్బల్ టీలు లేదా అల్లం కషాయం వంటి ద్రవాలను తీసుకోవాలి. ప్రొబయోటిక్స్ జీర్ణవ్యవస్థ ఆరోగ్యానికి పెరుగు, మజ్జిగ వంటి ప్రొబయోటిక్స్ తప్పకుండా తీసుకోవాలి. ఇవి పేగుల్లో మంచి బ్యాక్టీరియాను పెంచి జీర్ణక్రియను మెరుగుపరుస్తాయి. అయితే వీటిని తాజాగా ఉన్నప్పుడు మాత్రమే తీసుకోవాలి. ఇప్పటివరకు మన శరీరానికి మంచి చేసే ఫుడ్ ఐటమ్స్ గురించి తెలుసుకున్నాం. అలానే వర్షాకాలంలో కొన్ని ఆహారాలకు దూరంగా ఉండడం కూడా ఎంతో ముఖ్యం. తేమతో కూడిన వాతావరణం కారణంగా కొన్ని రకాల ఆహార పదార్థాలు త్వరగా పాడవుతాయి.కాబట్టి ఈ కింది వాటికి దూరంగా ఉండటం చాలామంచిది. స్ట్రీట్ ఫుడ్, సలాడ్లు ఈ కాలంలో నీళ్లలో బ్యాక్టీరియా వేగంగా వ్యాప్తి చెందుతుంది. కాబట్టి రోడ్డు పక్కన దొరికే పానీపూరి, చాట్ వంటి స్ట్రీట్ ఫుడ్ తో పాటు పచ్చి కూరగాయలతో చేసే సలాడ్లకు దూరంగా ఉండాలి. కేవలం ఇంట్లో వండిన తాజా ఆహారాన్ని మాత్రమే తీసుకోవాలి. ఆయిల్ ఫుడ్ నూనెలో వేయించిన పదార్థాలు (పకోడి, సమోసాలు), ఎక్కువ మసాలాలు కలిగిన కూర్మాలు మన డైజెషన్ ను స్లో చేస్తాయి. దీంతో అసిడిటీ, గ్యాస్ వంటి జీర్ణ సమస్యలు రావచ్చు. ఆకుకూరల విషయంలో జాగ్రత్త వర్షాకాలంలో ఆకుకూరలపై సూక్ష్మక్రిములు ఉండే అవకాశం ఎక్కువ. ఒకవేళ పాలకూర, బచ్చలి, మెంతి ఆకుల వంటివి తీసుకోవాలనుకుంటే ముందుగా వాటిని శుభ్రంగా కడిగి బాగా ఉడికించిన తర్వాతే తినాలి. డైరీ ప్రొడక్ట్స్ నిల్వ ఉంచొద్దు పాలు, చీజ్, పన్నీర్ వంటి పాల ఉత్పత్తులు ఈ వాతావరణంలో త్వరగా పాడవుతాయి. ఇవి పూర్తిగా తాజావని తెలిస్తేనే తినాలి. లేదంటే వీటికి ప్రత్యామ్నాయంగా బాదం పాలు, సోయాపాలు తీసుకోవచ్చు. వర్షాకాలంలో చల్లగా ఉండడంతో మనం ఎక్కువ నీటిని తాగము. ఇలా చేయడం చాలా ప్రమాదకరం. శరీరానికి కావాల్సినంత నీటిని తీసుకోకపోతే డీహైడ్రేషన్కు గురై అలసట, జీర్ణ సమస్యలు తలెత్తుతాయి. కాబట్టి దాహం వేయకపోయినా తగినంత నీరు తాగడం ముఖ్యం. సరైన పోషకాహారంతో పాటు కలుషితం కాని పరిశుభ్రమైన వేడి వేడి ఆహారం తీసుకోవడం, హైడ్రేటెడ్గా ఉండటం, తగినంత నిద్ర, క్రమంతప్పకుండా వ్యాయామం చేస్తే వర్షాకాలంలో వచ్చే సీజనల్ వ్యాధుల బారిన పడకుండా ఆరోగ్యాన్ని కాపాడుకోవచ్చని వైద్యులు స్పష్టం చేస్తున్నారు. గమనిక: పలు అధ్యయనాలు, పరిశోధనలు, హెల్త్ జర్నల్స్ నుంచి కలెక్ట్ చేసిన ఇన్ఫర్మేషన్ ని మీ అవగాహన కోసం ఇక్కడ అందించాం. ఆరోగ్యానికి సంబంధించి మీకు ఎలాంటి సందేహాలున్నా తప్పకుండా డాక్టర్ను సంప్రదించాలి