అయోధ్య రామ్ మందిర్ విరాళాల స్కామ్: చంపత్ రాయ్ రాజీనామాపై కీలక మీటింగ్.. కొత్త CEO నియామకం?

అయోధ్య రామ్ మందిర్ విరాళాల స్కామ్ పై పెద్ద వివాదమే నడుస్తోంది. ఆలయ కానుకల చోరీ, అవకతవకల విషయంపై సోమవారం మధ్యాహ్నం 3 గంటలకు రామ్ మందిర్ కాంప్లెక్స్లో అయోధ్య ట్రస్ట్ ఒక కీలక సమావేశం ఏర్పాటు చేసింది. తమ పదవులకు రాజీనామా చేసిన జనరల్ సెక్రటరీ చంపత్ రాయ్, ట్రస్టీ అనిల్ మిశ్రాల రాజీనామాలను ఆమోదించాలా? వద్దా? అనే దానిపై ఈ సమావేశంలోనే తుది నిర్ణయం తీసుకోనున్నారు. ఒకవేళ ఈ రాజీనామాలను ఆమోదిస్తే, ట్రస్ట్ వ్యవహారాలతో పాటు ఆలయ నిర్వహణను మరింత సమర్థవంతంగా చూసుకోవడానికి కొత్త చీఫ్ ఎగ్జిక్యూటివ్ ఆఫీసర్ (CEO)ని నియమించే ఆలోచన కూడా చేయనున్నారు. ఈ సమావేశానికి హాస్పిటల్ నుండి డిశ్చార్జ్ అయిన ట్రస్ట్ ప్రెసిడెంట్ మహంత్ నృత్య గోపాల్ దాస్ కూడా వచ్చే అవకాశముంది. సీనియర్ అడ్వకేట్ కె. పరాశరన్ వర్చువల్గా జాయిన్ అవుతుండగా...కేంద్ర, రాష్ట్ర ప్రభుత్వాల తరపున అడిషనల్ సెక్రటరీ ప్రశాంత్ లోఖండే, ఐఏఎస్ సంజయ్ ప్రసాద్, అయోధ్య డీఎం శశాంక్ త్రిపాఠి లాంటి ఉన్నతాధికారులు కూడా ఈ సమావేశంలో పాల్గొనబోతున్నారు. ఈ సందర్భంగా స్పెషల్ ఇన్వెస్టిగేషన్ టీమ్ (SIT) ఇచ్చిన నివేదికతో పాటు 2025-26 ఆర్థిక సంవత్సరానికి సంబంధించిన ఆదాయ-వ్యయాల నివేదికను కూడా సభ్యులు ఆమోదించనున్నారు.ప్రస్తుతం ఈ కేసులో ఇప్పటికే ఒక ఎఫ్ఐఆర్ నమోదుకావడంతో పాటు హుండీ కానుకలను లెక్కించే 8 మందిని పోలీసులు అరెస్ట్ చేశారు. వాళ్ల దగ్గర నుండి దాదాపు 80 లక్షల రూపాయలను రికవరీ చేశారు. అయితే ఈ స్కాంలో చంపత్ రాయ్, అనిల్ మిశ్రాల స్టేట్మెంట్స్ని ఎస్ఐటీ (SIT) రికార్డ్ చేసినప్పటికీ, వాళ్లపై ఎలాంటి ఎఫ్ఐఆర్ నమోదు చేయలేదు. ఈ లోపే సుమారు 5 కోట్ల రూపాయల విలువైన 'బంగారు పూత పూసిన రామచరితమానస్' పుస్తకం కూడా కనిపించడం లేదంటూ వార్తలు వచ్చాయి. ఈ ఆరోపణలపై స్పందించిన అయోధ్య ట్రస్ట్, ఆ పుస్తకం తమ దగ్గరే ఉందని స్పష్టం చేసింది. సిట్ తన దర్యాప్తును వేగవంతం చేయడంతో ఈ లూటీ వెనుకు ఉన్న పెద్ద తలకాయలు ఎవరన్నది త్వరలోనే బయటపడే అవకాశం ఉంది.