KARNATAKA | బస్సు స్టాప్‌లో నిల్చున్న విద్యార్థినిపై కిరాతక దాడి

కర్ణాటక రాష్ట్రంలో అత్యంత దిగ్భ్రాంతికరమైన ఘటన వెలుగుచూసింది. కాలేజీ పోయేందుకు బస్సు స్టాప్లో ఉన్న 17 ఏళ్ల మైనర్ బాలికపై ఒక వ్యక్తి కత్తితో అత్యంత దారుణంగా దాడి చేశాడు. పోలీసుల వివరాల ప్రకారం..కర్ణాటకలోని మంగళూరు జిల్లా బంత్వాల్ రూరల్ పరిధిలోని మొంటిమారు పద్పు బస్సు స్టాప్ సమీపంలో ఈ ఘోరం జరిగింది. బాధితురాలు స్థానిక కళాశాలలో చదువుకుంటోంది. ఎప్పటిలాగే సోమవారం ఉదయం ఆమె కళాశాల బస్సు కోసం బస్సు స్టాప్ దగ్గర వేచి చూస్తోంది. అదే సమయంలో అక్కడికి చేరుకున్న జవ్వార్ (28) అనే వ్యక్తి, అందరూ చూస్తుండగానే కత్తి తీసి ఆమెపై దాడికి దిగాడు. నిందితుడు జవ్వార్ ఆ బస్సు స్టాప్ పక్కనే ఒక కిరాణా దుకాణం నడుపుతున్నట్లు సమాచారం. ప్రయాణికుల కేకలతో పరార్.. నిందితుడు కత్తితో యువతిపై విచక్షణారహితంగా దాడి చేయడాన్ని గమనించిన తోటి ప్రయాణికులు, స్థానికులు పెద్ద ఎత్తున కేకలు వేశారు. దీంతో భయపడిన నిందితుడు జవ్వార్ కత్తిని అక్కడే పడేసి ఘటనా స్థలం నుండి పారిపోయాడు. ఈ దాడిలో తీవ్రంగా గాయపడి స్పృహతప్పిన ఆ బాలికను స్థానికులు మంగళూరులోని ఒక ప్రైవేట్ ఆసుపత్రికి తరలించారు. ప్రస్తుతం ఆమె అత్యవసర విభాగంలో చికిత్స పొందుతోంది. పోలీసుల దర్యాప్తు ముమ్మరం సమాచారం అందుకున్న బంత్వాల్ రూరల్ పోలీసులు ఘటనా స్థలానికి చేరుకుని పరిశీలించారు. అనంతరం ఆసుపత్రికి వెళ్లి బాధితురాలి నుంచి వివరాలను సేకరించి కేసు నమోదు చేశారు. అయితే, ఆ మైనర్ బాలికపై నిందితుడు ఎందుకు దాడి చేశాడనే దానికి సంబంధించిన కచ్చితమైన కారణాలు ఇంకా తెలియవు. దీని వెనుక వేధింపుల కోణం ఉందా లేదా మరేదైనా కారణం ఉందా అనే కోణంలో పోలీసులు విచారణ జరుపుతున్నారు. పారిపోయిన నిందితుడు జవ్వార్ను పట్టుకోవడానికి పోలీసులు ప్రత్యేక బృందాన్ని ఏర్పాటు చేసి వేట సాగిస్తున్నారు.