Mohanlal: ఏనుగు దంతాల కేసులో కీలక పరిణామం..మోహన్‌లాల్ వద్ద 46 కిలోల విగ్రహాలు, దంతాలు

మలయాళ సూపర్ స్టార్ మోహన్లాల్ చుట్టూ ఉన్న ఏనుగు దంతాల వివాదం మళ్లీ హాట్ టాపిక్గా మారింది. ఎలాంటి అనుమతులు లేకుండా వన్యప్రాణుల దంతాలు, వాటితో చేసిన వస్తువులను అక్రమంగా ఇంట్లో ఉంచుకున్నారనే ఆరోపణలపై ఆయన 15 ఏళ్లుగా కోర్టు విచారణ ఎదుర్కొంటున్నారు. తాజాగా ఈ కేసులో ఓ కీలక పరిణామం చోటుచేసుకుంది. గతంలో తన దగ్గర 4 ఏనుగు దంతాలు ఉన్నాయని ప్రకటించిన మోహన్ లాల్, ఇప్పుడు మరో 6 దంతాలు ఉన్నాయనే విషయాన్ని బయటపెట్టారు. వాటితో పాటు ఏనుగు దంతాలతో చేసిన 13 విగ్రహాలు కూడా తన దగ్గర ఉన్నాయని చెప్పారు. కేరళ అటవీ శాఖ ఇచ్చిన క్షమాభిక్ష పథకంలో భాగంగా మోహన్ లాల్ తాజాగా ప్రకటన చేసినట్లు తెలుస్తోంది. తన వద్ద ఉన్న దంతాలు, విగ్రహాలలో చాలా వరకు తనకు వారసత్వంగా వచ్చాయని, కొన్ని బహుమతిగా వచ్చాయని మోహన్ లాల్ స్పష్టం చేశారు. మోహన్ లాల్ ప్రకటించిన ఏనుగు దంతాల విగ్రహాలలో రాముడు, కృష్ణుడు, బాలాజీ రూపాలు ఉన్నాయని అటవీ శాఖ అధికారులు తెలిపారు. వాటి మొత్తం బరువు సుమారు 46 కిలోలు ఉంటుందని అంచనా వేస్తున్నారు. ఈ విగ్రహాలకు డీఎన్ఏ (DNA) పరీక్షలు నిర్వహించనున్నట్లు అటవీ శాఖ అధికారులు తెలిపారు.