Tamil Nadu TVK Govt Controversy: సీఎం విజయ్ సర్కార్‌లో ప్రైవేట్ వ్యక్తుల పెత్తనం? గవర్నర్‌కు చేరిన లీకుల పంచాయితీ

తమిళనాడులో దాదాపు ఆరు దశాబ్దాల ద్రావిడ పాలనకు చరమగీతం పాడుతూ..ముఖ్యమంత్రి సి. జోసెఫ్ విజయ్ నేతృత్వంలోని తమిళగ వెట్రి కజగం (TVK) పార్టీ అతిపెద్ద పార్టీగా అవతరించి సరికొత్త చరిత్ర సృష్టించిన సంగతి తెలిసిందే. అయితే, ప్రభుత్వం ఏర్పాటైన 50 రోజుల్లోనే వరుస వివాదాలు ఆ ఎన్నికల విజయాన్ని నీరుగార్చేలా మారుతున్నాయి. సీఎం విజయ్ రాజకీయ సలహాదారుడిగా చెప్పుకుంటున్న జాన్ అరోకియాసామి, అలాగే సీఎంకు అత్యంత సన్నిహితుడైన విష్ణు రెడ్డి ల వైఖరి వివాదాస్పదంగా మారింది. ప్రభుత్వంలో ఎలాంటి అధికారిక పదవులూ లేకపోయినప్పటికీ, వీరిద్దరూ కీలకమైన ప్రభుత్వ సమీక్షలు, క్యాబినెట్ సమావేశాల్లో పాల్గొంటూ పరిపాలనను శాసిస్తున్నారని ప్రతిపక్షాలు తీవ్ర ఆరోపణలు చేస్తున్నాయి. కన్యాకుమారిలో అణు ఖనిజాల తవ్వకాలపై జూలై 3న సచివాలయంలో సహజ వనరుల శాఖ మంత్రి టి.కె. ప్రభు నేతృత్వంలో కీలక సమావేశం జరిగింది. ఈ మీటింగ్కు సంబంధించిన ఫోటోలను మంత్రి తన అధికారిక సోషల్ మీడియా ఖాతాలో షేర్ చేశారు. అందులో ఆర్థిక మంత్రి ఎన్. మరియా విల్సన్, మత్స్య శాఖ మంత్రి శ్రీనాథ్, ఐఏఎస్ అధికారులతో పాటు విష్ణు రెడ్డి కూడా కూర్చొని ఉండడం చర్చనీయాంశంగా మారింది. మొదట డీఎంకే (DMK) లేవనెత్తిన ఈ ‘షాడో అడ్వైజర్స్’ వివాదాన్ని ఇప్పుడు బీజేపీ (BJP) కూడా అందుకోవడంతో ప్రభుత్వం ఆత్మరక్షణలో పడింది గవర్నర్ కు ఫిర్యాదు చేసిన బీజేపీ తమిళనాడు బీజేపీ రాష్ట్ర అధ్యక్షుడు నైనార్ నాగేంద్రన్ నేతృత్వంలోని ప్రతినిధి బృందం శుక్రవారం రాజ్భవన్లో గవర్నర్ రాజేంద్ర విశ్వనాథ్ అర్లేకర్ను కలిసి రెండు వేర్వేరు వినతిపత్రాలను సమర్పించింది. అందులో ఒకటి మధురై మారథాన్ ఈవెంట్లో ఉన్నత విద్యాశాఖ మంత్రి పి. విశ్వనాథన్ ప్రవర్తనపై కాగా.. రెండోది పూర్తిగా జాన్ అరోకియాసామి, విష్ణు రెడ్డిల గురించినదే. జూన్ 5న జరిగిన తమిళనాడు క్యాబినెట్ సమావేశంలో ఎలాంటి ప్రభుత్వ పదవులు లేని ఈ ఇద్దరు ప్రైవేట్ వ్యక్తులు పాల్గొన్నారని బీజేపీ ఆరోపించింది. ఇది రాజ్యాంగ సూత్రాలకు, పరిపాలనా నియమాలకు పూర్తిగా విరుద్ధమని.. దీనిపై తక్షణమే విచారణ జరిపించాలని గవర్నర్ను కోరింది. అంతకుముందే డీఎంకే ఫిర్యాదు బీజేపీ కంటే ముందే జూన్ 30న డీఎంకే ఆర్గనైజింగ్ సెక్రటరీ ఆర్.ఎస్. భారతి తమిళనాడు డీజీపీకి దీనిపై ఒక లిఖితపూర్వక ఫిర్యాదు చేశారు. ప్రభుత్వ రహస్యాల చట్టం (Official Secrets Act, 1923) కింద క్రిమినల్ చర్యలు తీసుకోవాలని ఆయన డిమాండ్ చేశారు. సీఎం విజయ్ ఆధ్వర్యంలో జరిగే క్యాబినెట్ సమావేశాలు, శాఖల వారీ సమీక్షల్లోని అత్యంత రహస్యమైన సమాచారం అనధికారిక వ్యక్తుల చేతుల్లోకి వెళ్తోందని ఆయన ఆరోపించారు. ఆంధ్రప్రదేశ్కు చెందినట్లుగా చెప్తున్న ఈ ఇద్దరు వ్యక్తులకు సచివాలయంలో సీఎం కార్యాలయం పక్కనే ప్రత్యేక గదులను కూడా కేటాయించారని.. సీఎంను కలవడానికి వచ్చే వినతిదారులను సైతం విష్ణు రెడ్డిని కలవాల్సిందిగా పంపుతున్నారని డీఎంకే నేత ఫిర్యాదులో ఆరోపించారు. సచివాలయ సీసీటీవీ విజువల్స్, విజిటర్స్ రిజిస్టర్లను పరిశీలిస్తే నిజాలు బయటపడతాయన్నారు. ప్రభుత్వం ఏమంటుందంటే.. ఈ వ్యవహారంపై ఒక టీవీకే (TVK) క్యాబినెట్ మంత్రిని సంప్రదించగా.. "మొదటి క్యాబినెట్ మీటింగ్లో నేను వీరిని చూడలేదు, వీరికి అధికారికంగా ఎలాంటి పదవులు ఇచ్చారో లేదో నాకు తెలియదు, కేవలం వార్తల్లో చూసిందే తెలుసు" అని దాటవేశారు. అయితే, సచివాలయ వర్గాలు మాత్రం వారు సీఎంతో నిరంతరం ఉంటూ, ఆయన కార్యాలయం పక్కనే ఉన్న క్యాబిన్లను వాడుతున్న మాట వాస్తవమేనని అంగీకరించాయి. ఇప్పటివరకు వీరి నియామకాలపై ప్రభుత్వం ఎలాంటి జీవో (GO) గానీ, అధికారిక ప్రకటన గానీ విడుదల చేయకపోవడం విశేషం. ఆలస్యంగా జీవోల విడుదల తమిళనాడు ప్రభుత్వంలో ఇలాంటి పారదర్శకత లోపించడం ఇదే మొదటిసారి కాదు. గతంలో సీఎం విజయ్ వ్యక్తిగత సన్నిహితుడు, సినీ నిర్మాత జగదీష్ పళనిసామిని సీఎం ప్రైవేట్ సెక్రటరీగా నియమించినప్పుడు కూడా వివాదం రేగింది. ఆయన మే 12నే బాధ్యతలు స్వీకరించినట్లు జీవోలో ఉన్నప్పటికీ.. మే 22న విజయ్ బర్త్డే సందర్భంగా జగదీష్ స్వయంగా విష్ చేసినప్పుడే ఆ విషయం వెలుగులోకి వచ్చింది, ఆ తర్వాతే ప్రభుత్వం జీవో రిలీజ్ చేసింది. అలాగే ఢిల్లీలో తమిళనాడు ప్రభుత్వ ప్రత్యేక ప్రతినిధిగా కేవీఎన్ ప్రొడక్షన్స్ అధినేత వెంకట్ కె. నారాయణ నియామక జీవో కూడా తీవ్ర ఆలస్యంగా వచ్చింది. అంతకుముందు సీఎం విజయ్ తన వ్యక్తిగత జ్యోతిష్యుడిని రాజకీయ సలహాదారుగా నియమించి, తీవ్ర విమర్శలు రావడంతో ఆ ఆర్డర్ను వెనక్కి తీసుకున్నారు. ఈ నేపథ్యంలో ఇప్పుడు జాన్ అరోకియాసామి, విష్ణు రెడ్డిల చుట్టూ ముసురుకున్న ఈ 'షాడో అడ్వైజర్' వివాదం.. సీఎం విజయ్ ప్రభుత్వ పారదర్శకతను మరోసారి ప్రశ్నార్థకం చేస్తోంది.