Nagabandham Review | డైరెక్టర్ ఈ ఒక్క పని చేసి ఉంటే సినిమా రేంజ్ ఎక్కడికో వెళ్లేది

పెదకాపు ఫేమ్ విరాట్ కర్ణ హీరోగా, నభా నటేష్, ఐశ్వర్య మీనన్ హీరోయిన్లుగా.. అభిషేక్ నామా డైరెక్షన్లో తెరకెక్కిన ఎపిక్ అడ్వెంచర్ థ్రిల్లర్ 'నాగబంధం'. ప్రమోషన్స్ తో భారీ హైప్ క్రియేట్ చేసిన ఈ సినిమా శుక్రవారం థియేటర్లలోకి వచ్చేసింది. మరి హనుమాన్, కార్తికేయ రేంజ్లో ఈ డివోషనల్ మిస్టరీ థ్రిల్లర్ ఆకట్టుకుందా? లేక ఆడియన్స్కి బోర్ కొట్టించిందా? అనేది ఈ రివ్యూ లో చూద్దాం. అసలు కథ ఏంటంటే? ఈ సృష్టిని శాసించే పవర్ ఉన్న 'బ్రహ్మకమలం' చుట్టూ ఈ స్టోరీ తిరుగుతుంది. 1962 బ్యాక్డ్రాప్లో ఆర్కియాలజిస్ట్ ప్రభాకర్ (జగపతిబాబు) , రంగనాథస్వామి టెంపుల్ లో ఆ బ్రహ్మకమలం ఉందని కనిపెడతాడు. అయితే విలన్ అలీ (రిషబ్ సహానీ) ఆ బ్రహ్మకమలాన్ని దొంగిలించడానికి ప్లాన్ చేస్తాడు. మరోవైపు హీరో రుద్ర (విరాట్ కర్ణ) కి తన ఫ్యామిలీ అంటే ప్రాణం. కానీ రుద్ర చెల్లి పెళ్లి రోజే విలన్ గ్యాంగ్ ఎంట్రీ ఇచ్చి.. బ్రహ్మకమలం కోసం రుద్ర అమ్మని, చెల్లిని, అత్తని ఊచకోత కోసి, ఆ కమలాన్ని ఎత్తుకెళ్లిపోతారు. ఇదే టైమ్లో హీరో లవర్ పార్వతి (నభా నటేష్) కూడా హీరోకి వెన్నుపోటు పొడుస్తుంది. మరి ఆ బ్రహ్మకమలంతో విలన్ నాగబంధాన్ని విడిపించి అత్యంత శక్తివంతుడు అయ్యాడా? తన ఫ్యామిలీని చంపిన విలన్స్పై హీరో ఎలా రివెంజ్ తీర్చుకున్నాడు? అసలు అనంత పద్మనాభస్వామి టెంపుల్ కి ఈ కథకి ఉన్న కనెక్షన్ ఏంటి? అనేది మిగిలిన సినిమా. సినిమా ఎలా ఉందంటే? ఈ మధ్య కాలంలో సనాతన ధర్మం, హిందుత్వం బ్యాక్డ్రాప్ లో వచ్చే సినిమాలకు ఆడియన్స్ లో మంచి క్రేజ్ ఉంది. అయితే కథలో దైవత్వం ఆర్గానిక్గా ఉంటే ఓకే కానీ.. కావాలని ఇరికిస్తేనే థియేటర్లలో సీన్ రివర్స్ అవుతుంది. 'నాగబంధం' విషయంలో సరిగ్గా ఇదే జరిగింది. సినిమా స్టార్టింగ్ నుండి డైరెక్టర్ కి కథ మీద ఒక క్లారిటీ లేనట్టు అనిపిస్తుంది. ఒక సీన్ కి ఇంకో సీన్ కి అసలు సింక్ ఉండదు. స్క్రీన్ ప్లే అంతా కన్ఫ్యూజింగ్ గా అనిపిస్తుంది. మిస్సయిన ఎమోషన్స్ ఏ సినిమాకైనా ఎమోషన్స్ చాలా ముఖ్యం, కానీ ఇందులో ఆ ఎమోషనల్ కనెక్ట్ అస్సలు కుదరలేదు. పెళ్లి మండపంలో హీరో ఫ్యామిలీ మొత్తాన్ని విలన్ క్రూరంగా చంపేసే సీన్స్ టూ మచ్ వైలెంట్ గా అనిపిస్తాయి తప్ప.. ఆడియన్స్ ని ఎమోషనల్గా టచ్ చేయవు. ఫస్టాఫ్ లో కథ పెద్దగా లేకపోయినా గ్రాండియర్ విజువల్స్, సాంగ్స్ తో నడిపించేశారు. ఇంటర్వెల్ ట్విస్ట్ బాగుండి, సెకండాఫ్ పై అంచనాలు పెంచుతుంది. కానీ సెకండాఫ్ మరీ స్లోగా సాగుతూ ఆడియన్స్ కి విసుగు తెప్పిస్తుంది. సెకండాఫ్ లో హీరో రివెంజ్ కోసం వెళ్లే ఫ్లాష్ బ్యాక్ ఎపిసోడ్స్ ఆడియన్స్ కి అస్సలు కనెక్ట్ కావు. ఇక క్లైమాక్స్ యాక్షన్ ఎపిసోడ్ అయితే దాదాపు అరగంటకు పైగా సాగుతుంది. స్క్రీన్ నిండా అరుపులు, కేకలతో థియేటర్ లో విసుగు తెప్పిస్తారు. హిందుత్వం, సనాతన ధర్మం అంటూ క్లైమాక్స్ లో చేసిన హడావుడి ప్రేక్షకులను ఏమాత్రం ఆకట్టుకోదు. ఎవరెలా చేశారంటే రుద్ర క్యారెక్టర్ లో విరాట్ కర్ణ చాలా బాగా యాక్ట్ చేశాడు. సాధువుగా, యాక్షన్ సీన్స్ లో రఫ్ అండ్ టఫ్ లుక్ లో మెప్పించాడు. కాకపోతే ఈ రేంజ్ భారీ సినిమాను తన భుజాల మీద మోయడానికి ఆయన ఇమేజ్ సరిపోలేదు. పార్వతి క్యారెక్టర్ లో డ్యూయల్ రోల్ చేసి అదరగొట్టింది నభా నటేష్. ఆమె క్యారెక్టర్ లో వచ్చే ట్విస్ట్ సినిమాకే వన్ ఆఫ్ ది బెస్ట్ పార్ట్. జగపతిబాబు ఆర్కియాలజిస్ట్ గా మెప్పించగా, విలన్ గా రిషబ్ భయంకరమైన లుక్ తో అదరగొట్టాడు. అనసూయ, ఐశ్వర్య మీనన్ తమ క్యారెక్టర్ పరిధి మేరకు ఓకే అనిపించారు. టెక్నికల్ డిపార్ట్మెంట్ సినిమాకి బిగ్గెస్ట్ అసెట్ ఏదైనా ఉందంటే అది కెమెరా వర్క్ అండ్ మ్యూజిక్ మాత్రమే. సౌందర్రాజన్ విజువల్స్ చాలా గ్రాండియర్గా ఉన్నాయి. వీఎఫ్ఎక్స్ కొన్ని చోట్ల తేలిపోయినా.. ఓవరాల్ గా ప్రొడక్షన్ వాల్యూస్ రిచ్ గా ఉన్నాయి. జునైడ్ కుమార్, అభిషిక్త్ అందించిన బ్యాక్గ్రౌండ్ స్కోర్ సినిమాను నెక్స్ట్ లెవెల్ కి తీసుకెళ్లింది. డైరెక్టర్ అభిషేక్ నామా బడ్జెట్ విషయంలో ఎక్కడా కాంప్రమైజ్ అవ్వలేదు కానీ.. స్క్రీన్ప్లే లో, క్లారిటీ లో మాత్రం ఫెయిల్ అయ్యాడు. ముగింపు 'నాగబంధం' టెక్నికల్గా, విజువల్స్ పరంగా చాలా గ్రాండ్గా ఉన్నప్పటికీ.. లక్ష్యం లేని కథ, ల్యాగ్ సీన్స్, క్లైమాక్స్ అరుపులతో బోర్ కొట్టిస్తుంది. థియేటర్ లో విజువల్ వండర్ ఎంజాయ్ చేయాలి అనుకునే వాళ్ళు ఒకసారి ట్రై చేయొచ్చు కానీ.. ఓవరాల్ గా ఇది ఆడియన్స్ పై డైరెక్టర్ చేసిన 'నాగబంధం ప్రయోగం' అనే చెప్పాలి. వన్ లైన్ పంచ్: విజువల్స్ పీక్స్.. కథ వీక్స్.